Иҗтимаий таратқулардики шикайәтләр уйғур районидики юқум вәзийитиниң еғирлиқини ашкарилимақта

Мухбиримиз ирадә
2022.09.08
Share on WhatsApp
Share on WhatsApp

Хитайниң “тәңритағ тори” қатарлиқ һөкүмәт таратқулири 8-сентәбир тарқатқан хәвәргә қариғанда, 9-айниң 8-күни саәт 21:00 гичә болған арилиқта уйғур елида йәнә 22 нәпәр аламәтсиз юқумдар көпәйгән. Булар үрүмчидә 8 нәпәр, ғулҗа шәһиридә 8, корла шәһиридә 6 нәпәр икән. Хәвәрдә йәнә һазирғичә уйғур елида байқалған омумий аламәтсиз юқумдар сани 559 нәпәр, дәп көрситилгән.

Хитай һөкүмәт даирилири уйғур елидики юқум әһвалиниң контрол астиға елинғанлиқи, юқумни тезгинләш хизмәтлириниң тәртиплик йүргүзүлүватқанлиқини илгири сүрсиму, бирақ хитайдики иҗтимаий таратқуларда барғансери көпийиватқан һәрхил әрз-шикайәтләр буниң әксини сөзлимәктә. Хитай тарартқулириниң 8-сентәбирдики хәвиридә дейилишичә, уйғур райони, хәйнән өлкиси қатарлиқ җайларда юқум вәзийити контроллуқ астиға елинған болсиму, лекин тибәт қатарлиқ җайлардики юқум әһвалини тизгинләш ишлири җиддий елип берилмақтикән.

Болупму бир айға йеқин вақиттин бери қаттиқ қамалда қеливатқан уйғурларниң өйлиригә вақти-вақтида йемәк-ичмәк тәминләнмигәнликтин ушшақ бала-чақиларни өз ичигә алған бир аилә кишилириниң ачлиқ азаби тартиватқанлиқи, һәтта бәзи күнлүк ишләп пул тапидиған аилиләрниң интайин қиммәт баһада сетип бериливатқан йемәкликләрни сетивелишқа қурби йәтмәй ач қеливатқанлиқидәк видийоларниң барғансери көпийиши, күчлүк диққәт қозғимақта.

Хитай һөкүмәт даирилириниң аһалиләрни юқум мәзгилидә “өсәк сөз тарқатмаслиқ” һәққидә қаттиқ агаһландурушиға қаримай, авам арисида күсайин көпийиватқан дад-шикайәтләр нөвәттә қамал астидики уйғур аилилири дуч келиватқан зор көләмлик ачарчилиқниң интайин еғирлиқини көрситип беридикән.

Муһаҗирәттики уйғур җамаити болса уйғур елидики чекидин ашқан бу қамал вә уйғурлар дучар қилиниватқан бу сүний ачлиқниң мәқсити вә ақивитидин җиддий әндишә қилмақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.