Хитай даирилири уйғур елидики юқумға қарши қамалниң җәнубтики вилайәт, областларғиму кеңийидиғанлиқидин бишарәт бәрди

Мухбиримиз әркин
2022.11.14
Share on WhatsApp
Share on WhatsApp

Хитай даирилири уйғур елида 100 күндин бери давамлишип келиватқан йеңи типлиқ таҗисиман вирусиға қарши қамалниң җәнуптики вилат, областларғиму кеңийиши мумкинликидин бишарәт бәргән. Чәт ‍әлдики вәзийәттин хәвәрдар кишиләрниң ейтишичә, әгәр илгири ғулҗа, үрүмчи, турпан қатарлиқ җайларда йолға қоюлған қамал қиш мәзгилидә җәнубтики уйғурлар мәркәзлик олтурақлашқан вилайәт, областларда йүргүзүлсә, буниң техиму ечинишлиқ паҗиәләрни кәлтүрүп чиқириш мумкинчилики әндишә қозғимақта икән.

Хитай даирилириниң ғулҗа қатарлиқ җайларда йүргүзгән юқумға қарши қамали ачарчилиқ пәйда қилип, адәм үлүшни кәлтүрүп чиқарған иди. “шинҗаң гезити”ниң хәвәр қилишичә, уйғур аптоном районлиқ партком 13-ноябир күни райондики 14 вилайәт, област вә шәһәрниң екран йиғини чақирип, юқумға қарши йеңи орунлаштуруш елип барған. Йиғинда уйғур аптоном районлуқ парткомниң секритари ма шиңруй сөз қилип, қәшқәр, хотән, ақсу, қизилсу қатарлиқ вилайәт-областларда дәсләпки кесәллик әһвали көрүлүшкә башлап, башқа районларға тарқилиш хәвпи артқанлиқини, юқумниң алдини елиш вә контрол қилиш вәзийитиниң йәнила кәскин вә мурәккәп икәнликини ейтқан.

Ма шиңруй сөзидә вәзийәтни кәскин вә мурәккәп, дәп көрсәткән болсиму, лекин у юқумниң юқириқи бу вилайәт, областлардики тарқилиш әһвалиға даир конкирет санлиқ мәлумат бәрмигән.

Униң көрситишичә, һәр қайси җайлар кесәлниң “сиртқа тарқилишини контрол қилиш, ички қисимда актип мудапийә көрүш омумий истиратегийәдә тәврәнмәй, юқумни нөлгә чүшүрүш йолида чиң туруш керәк” икән. У һәр дәриҗилик кадирларниң сиясий җавабкарлиқни үстигә елип, “пүтүн шинҗаңни, йәрлик билән биңтуәнни бир шаһмат тахтиси дәп қарашта чиң туруши”, “техиму қәтий вә кәскин болуп, юқумниң тарқилишини қәтий тосуш”ни тәләп қилған. Ма шиңруйниң хитай өлкилиридә юқумға қарши қамал пәйдин-пәй бикар қилиниватқан бир вақитта, қамални уйғур елиниң җәнубидики районларға кеңәйтишни тәкитлиши диққәт қозғимақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.