Xitay da'iriliri Uyghur élidiki yuqumgha qarshi qamalning jenubtiki wilayet, oblastlarghimu kéngiyidighanliqidin bisharet berdi

Xitay da'iriliri Uyghur élida 100 kündin béri dawamliship kéliwatqan yéngi tipliq tajisiman wirusigha qarshi qamalning jenuptiki wilat, oblastlarghimu kéngiyishi mumkinlikidin bisharet bergen. Chet ‍eldiki weziyettin xewerdar kishilerning éytishiche, eger ilgiri ghulja, ürümchi, turpan qatarliq jaylarda yolgha qoyulghan qamal qish mezgilide jenubtiki Uyghurlar merkezlik olturaqlashqan wilayet, oblastlarda yürgüzülse, buning téximu échinishliq paji'elerni keltürüp chiqirish mumkinchiliki endishe qozghimaqta iken.

Xitay da'irilirining ghulja qatarliq jaylarda yürgüzgen yuqumgha qarshi qamali acharchiliq peyda qilip, adem ülüshni keltürüp chiqarghan idi. “Shinjang géziti”ning xewer qilishiche, Uyghur aptonom rayonliq partkom 13-noyabir küni rayondiki 14 wilayet, oblast we sheherning ékran yighini chaqirip, yuqumgha qarshi yéngi orunlashturush élip barghan. Yighinda Uyghur aptonom rayonluq partkomning sékritari ma shingruy söz qilip, qeshqer, xoten, aqsu, qizilsu qatarliq wilayet-oblastlarda deslepki késellik ehwali körülüshke bashlap, bashqa rayonlargha tarqilish xewpi artqanliqini, yuqumning aldini élish we kontrol qilish weziyitining yenila keskin we murekkep ikenlikini éytqan.

Ma shingruy sözide weziyetni keskin we murekkep, dep körsetken bolsimu, lékin u yuqumning yuqiriqi bu wilayet, oblastlardiki tarqilish ehwaligha da'ir konkirét sanliq melumat bermigen.

Uning körsitishiche, her qaysi jaylar késelning “Sirtqa tarqilishini kontrol qilish, ichki qisimda aktip mudapiye körüsh omumiy istiratégiyede tewrenmey, yuqumni nölge chüshürüsh yolida ching turush kérek” iken. U her derijilik kadirlarning siyasiy jawabkarliqni üstige élip, “Pütün shinjangni, yerlik bilen bingtu'enni bir shahmat taxtisi dep qarashta ching turushi”, “Téximu qet'iy we keskin bolup, yuqumning tarqilishini qet'iy tosush”ni telep qilghan. Ma shingruyning xitay ölkiliride yuqumgha qarshi qamal peydin-pey bikar qiliniwatqan bir waqitta, qamalni Uyghur élining jenubidiki rayonlargha kéngeytishni tekitlishi diqqet qozghimaqta.