Erkin tuniyaz bilen ma shingrüyning yuqumni tizginlesh “Tedbiri” roshen sélishturma bolghan

Xitay taratquliri tönügün, yeni 11-ayning 17-küni  Uyghur aptonom rayonida alametlik yuqumdardin 27 ademning, alametsiz yuqumdardin 938 ademning köpeygenlikini xewer qilghan bolup, bir künning ichide Uyghur rayonidin minggha yéqin yuqumdarning köpiyishi diqqet qozghimaqta.

Ijtima'iy taratqularda, qeshqer shehiride yataqliq mektepte oquwatqan minglighan balilarning 100 kündin buyan solinip turuwatqanliqi, ach-tamaqsiz qalghanliqi we aghrip qalsimu dawalitilmay yatquzup qoyulghanliqi heqqide widiyo tarqalghan bolsimu, emma xitay metbu'atlirida qeshqer shehiridiki ahalilerge ozuq-tülük yetküzülüp bériliwatqanliqi teshwiq qilinmaqta.

Xitay metbu'atlirining xewer qilishiche, Uyghur aptonom rayonining re'isi erkin tuniyaz ürümchide xitaylar topliship olturaqlashqan midung, yéngi tereqqiyat rayoni qatarliq jaylardiki yuqumni tizginlesh xizmitini közdin kechürgende, “Teminleshni yaxshilap, puqralarning turmushigha kapaletlik qilish” qa yolyoruq bergen bolsa؛ Uyghur aptonom rayonluq partkomning sékritari ma shingrüy ürümchide Uyghurlar bir qeder köp olturaqlashqan saybagh rayoni qatarliq jaylarni közdin kechürüp, bu rayondiki ahalilerni dawamliq tekshürüp turush, da'imliq karantin qilishni buyrughan. Bu ikki emeldarning ikki rayon'gha tutqan perqliq siyasiti roshen sélishturma hasil qilghan bolup, Uyghur ahalilirining xitay puqralirigha qarighanda, téximu éghir kün'ge qalidighanliqidin bisharet bergen.