Xitayning ximiye sana'iti toqumichiliqi Uyghur diyarigha yötkelmekte

“Aqsu axbarat tori” ning yéqinqi xewiride éytilishiche, aqsu wilayitide köplep quruluwatqan “Sana'et sheherchisi” rayonlirigha xitay ölkiliridin sodiger chaqirish yéqinda resmiy bashlinip ketken.

Xewerde éytilishiche, buninggha da'ir deslepki tür süpitide jyangsu nentong tinch okyan toqumichiliq shirkiti we xangju ximiyelik tala cheklik shirkiti deslep bolup üch yérim milyard som (texminen 500 milyon amérika dolliri) qimmitide meblegh sélish kélishimi imzalighan. Bu qétimqi meblegh sélish türi pütkendin kéyin aqsu wilayitining toqumichiliq, kiyim-kéchek kespini pütünley dégüdek qolgha alidiken. Shundaqla aqsu wilayitini ximiyelik tala mehsulatlirini ishlepchiqiridighan bazigha aylanduridiken.

Halbuki ötken birnechche yildin buyan Uyghur diyaridiki mejburiy emgek hadisisining köp qismi del mushu xildiki xitay shirketliri achqan toqumichiliq zawutlirida körülüwatqan bolup, her sahening küchlük eyiblishige uchrap kelgenidi. Yillardin buyan xitay hökümitining Uyghur diyarini néfit we kömür mehsulatlirini pishshiqlap ishlesh bazisi qiliwalghanliqi, buning bilen pütkül rayon muhitining éghir derijide bulghinishigha yol échiliwatqanliqi melum bolghanidi. Emdilikte ularning ximiyelik toqulma sahesini Uyghur diyarigha élip kélishi bu jehettiki bulghinishni téximu éghirlashturidu, Uyghur ishlemchilirining salametlik mesililirini keltürüp chiqiridu dep qaralmaqtiken.