Шәндуңдики бир алий мәктәп йеқинқи 5 йилда қәшқәргә 1800 дин артуқ оқутқучи-оқуғучи әвәтип болған

Вашингтондин мухбиримиз әркин тәйярлиди
2024.02.26

2017-Йилидин башлап уйғур маарип сепиға қарита кәң көләмлик тазилаш елип барған хитай һөкүмити, ичкири өлкиләрдин нурғун хитайларни йөткәп чиқип, тазилашта уйғурлардин бош қалған орунларға кәң көләмдә сәплигән иди. Хитай таратқулириниң ашкарилишичә, уйғур дияриниң маарип сепиға хитайларни сәпләш һәрикити һазирму давам қилмақта икән.

2018-Йилдин бери хитайниң шәндуң ‍өлкисидики бир алий мәктәпниң өзидинла “нишанлиқ ярдәм бериш” намида қәшқәргә “оқутқучилиқ” үчүн йөткәп келингән хитай оқуғучилириниң сани 1800 ашқан. “шәндуң маарип телевизйәси” қанилиниң ашкарилишичә, 2018-йили 8-айдин башлап шәндуңниң завҗуаң шәһиридики “завҗуаң институти” дин һәр йили икки түркүмдә мәктәп пүттүргән 200 оқуғучи, 4 нәпәр йетәкчи оқутқучиниң башчилиқида қәшқәргә “оқутқучилиқ” қилиш үчүн йөткәп келингән.

Хәвәрләрдә, аз кәм 6 йил ичидә бу институттин қәшқәргә йөткәлгән оқуғучиларниң 1800 дин ашқанлиқи, бу кишиләрниң қәшқәрдики һәр қайси оттура-башланғуч мәктәпләрдә оқутқучилиқ қилип, өзини “вәтәнниң әң еһтияҗлиқ җайлири” ға атиғанлиқи тәкитләнмәктә. Лекин “шәндоң маарип телевизийәси” қанилиниң хәвиридә ашкарилишичә, қәшқәргә әвәтилгән бу кишиләрниң вәзиписи “оқутқучилиқ” билән чәкләнмигән. Улар йәрлик балиларға хитай тили, тарихи вә мәдәнийитини сиңдүрүш билән бир вақитта, “бәшкә кириш” паалийитигә қатнишип, аһалиләр комитетиға, йеза-кәнтләргә вә һәтта аилиләргичә киридикән.

Хәвәрдә, “завҗуаң институти” әдәбият факултетиниң муавин партийә секретари сөз қилип, “бәшкә кириш” ниң мәктәп, ‍идарә-җәмийәт, аһалиләр комитети, йеза-кәнт вә аилиләргә кириш икәнлики, бу кишиләрниң “бәшкә кириш” арқилиқ йәрлик аһалиләр вә бир қисим оқутқучиларниң дөләт тили сәвийәсини өстүрүшкә ярдәм қилидиғанлиқини ейтқан. Хитай һөкүмити 2017-йили башлап уйғур маарип сепини тазилаш билән бир вақитта, уйғур тилиниму маарип сепидин сиқип чиқарған иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.