Xitay da'iliri Uyghur élidiki chong kölemlik qurulush türlirining sür'itini tézletken

Xitay hökümitining Uyghur élini xitayning ishlepchiqirish, yéza-‍igilik, énirgye we xam eshya bazisigha aylandurush pilanidin kéyin, da'iriler rayondiki chong kölemlik qurulush türlirining sür'itini tézletken bolup, nurghun qurulush türliri muddettin burun ish bashlighan.

Xitayning “Shinxu'a tori” ning xewer qilishiche, Uyghur élida qish-qiro téxi toluq axirlashmighan bolsimu, lékin ürümchi ayrodomini kéngeytip qurush türi, Uyghur élining jenubidiki nurghun ammiwiy esliheler we sana'et baghchilirining qurulushlirida muddetttin burun ish bashlinip bolghan. Xewerde bu türlerning tömüryol qurulushlirinimu öz ichige alidighanliqi, “Lenjo-shinjang tömuryoli” ning jing-alataw arisidiki 2-liniyesidimu ish bashlinip bolghanliqi éytilghan.

Xitay taratqulirining xewerlerde, xitay da'irilirining rayondiki chong kölemlik qurulush türlirining sür'itini tézlitishte we muddettin burun ish bashlashta qandaq amillarni közde tutuwatqanliqi, uning néme üchün bundaq aldiraydighanliqi tilgha élinmighan.

Emma weziyettin xewerdar chet eldiki közetküchilerning éytishiche, buninggha xelq'ara weziyet, xitayning “Bir balwagh bir yol” qurulushi, Uyghur rayonini tézraq xitaylashturup, bu rayonni xitayning ishlepchiqirish, yéza-‍igilik, énirgiye we xam eshya bazisigha aylandurush teqezzasi seweb bolmaqta iken. “Shixu'a tori” ning xewiride qeyt qilishiche, Uyghur aptonom rayonluq hökümetning 2023-yilliq xizmet doklatida, rayonning bu yilliq iqtisadiy, ijtima'iy tereqqiyat mölcherdiki asasliq nishani omumi ishlepchiqirish miqtarini texminen 7 pirsettin ashurush, belgilik kölemdin éship ketken sana'etlerning omumiy ishlepchiqirish miqdarini texminen 9 pirsentke yetküzüsh otturigha qoyulghan. Xitayning ötken yilqi omumiy ishlepchiqirish miqdari 3 pirsentke chüshüp qalghan ehwalda, Uyghur rayonining bu yilliq omumiy ishlepchiqirishini qandaq qilip 7 pirsentke, bezi sahelerde 9 pirsentke yetküzüshi diqqet qozghimaqta.