Xitay taratquliri yéqinqi 9 yilda Uyghur rayonida yötkep ishletken emgek küchlirining 28 milyon 420 ming adem qétimgha yetkenlikini ashkarilighan

Muxbirimiz irade
2022.05.05
Share on WhatsApp
Share on WhatsApp

Birleshken döletler teshkilati kishilik hoquq aliy komissari mishél bachélétning Uyghur élidiki ziyariti yéqinliship qéliwatqan bir peytte, xitay hökümet taratqulirida Uyghurlarning atalmish “Kespiy maharet bilen terbiyelinip, ishqa orunlashturulghanliqi” heqqidiki xewerler köpiyishke bashlidi.

Xitayning “Tengritagh tori” 5-may künidiki xewiride, xitay hökümitining atalmish “Ishqa orunlashturush türini yolgha qoyup elge nep yetküzüsh” siyasitini yolgha qoyup, köp xil yol we shekil arqiliq ishqa orunlishishni muqimlashturghanliqi, 2012-yildin 2021-yilghiche Uyghur élida “Her yili ottura hésab bilen 1 milyon sheher-yéza ishchi-xizmetchilirining terbiyelen'genliki, terbiyelen'güchilerning maharet igilep ishqa orunliship muqim kirimge érishkenliki” qeyit qilin'ghan.

Xewerde yene mundaq diyilgen: “Yéqinqi yillardin buyan, rayonimiz ishqa orunlishish boshluqini aktipliq bilen kéngeytip toqumichiliq, kiyim-kéchek, éléktron mehsulatliri, ayaq, doppa, somka qatarliq emgek köjümleshken kesiplerni küchep tereqqiy qildurdi, zawutlarni bashqurup, séxlarning ishchi qobul qilishigha yardem bérish we yerlikning shara'itigha asasen yéza emgek mulazimitini qollidi. 2012-Yildin 2021-yilghiche, rayondiki yéza emgek küchlirining omumiy emeliy küchi 28 milyon 420 ming adem qétimgha yetti.”

Halbuki, yuqirida tilgha élin'ghan kespler Uyghur mejburiy emgiki bilen bulghan'ghanliqi delillen'gen saheler bolup, amérika qatarliq gherb elliri toqumichiliq, kiyim-kéchek we éliktron mehsulatliri saheside éghir derijide Uyghur mejburiy emgikining mewjut ikenlikini ilgiri sürüp kelmekte. Shu sewebtin amérika hökümiti Uyghur élining paxtisi we bir qisim éliktron mehsulatliri shirketlirini jazalighan idi.

“Tengritagh tori” ning ilgiri sürüshiche, Uyghur aptonom rayonluq adem küchi bayliqi we ijtima'iy kapalet nazaritining mes'ul xadimi “14-Besh yilliq pilan” mezgilide, Uyghur élida her yili 2 milyon 750 ming yéza emgek küchini yoqirqi sahelerde “Ishqa orunlashturush” qa kapaletlik qilmaqchi boluwatqanliqini bildürgen.

Mezkur xewerde yene a'ile ayallirining hazir zawutlarda yénik sana'et ishchilirigha aylan'ghanliqi, déhqanlarning yerliridin ayrilip zawut-fabrikilarda yaki türlük karxanilarda emgek küchige tayinip ma'ash alidighan ishchi bolghanliqidek misallar teshwiq qilin'ghan.

Amérikadiki Uyghur ziyaliysi élshat hesen ependining qarishiche, yoqiriqi bu xewer xitay hökümitining Uyghur élida xitay za'uwt-karxanilirini köpeytip, ularni muqim ishchi menbesi bilen teminleshke kapaletlik qiliwatqanliqini, jümlidin yüzminglighan Uyghurning eslidiki ata miras kespliridin, térilghu yéridin ayrilip xitay zawutlirida qul emgekchilirige ayliniwatqanliqini körsitip béridiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.