Xitay 200 milyon ajritip, qeshqerde “Ishlesh we olturushqa qolayliq yéza-kentler” berpa qilishqa kirishken

Muxbirimiz erkin
2022.05.06
Share on WhatsApp
Share on WhatsApp

Xitay hökümiti Uyghur élida 2017-yildin bashlap keng kölemlik qurushqa bashlighan “Qolayliq saqchi ponkitliri” din kéyin, emdi “Qolayliq yéza-kentler” ni qurushqa kirishken. Xitay taratqulirining xewerliridin melum bolushiche, xitayning “Qolayliq yéza-kentler” qurulushi Uyghur nopusining asasliq merkizi we Uyghur medeniyitining nechche ming yilliq böshüki bolghan qeshqerdin bashlan'ghan. Yerlik da'iriler xitay taratqulirigha bergen uchurlirida qeshqerdin bashlan'ghan bu qurulushqa 200 milyon yüen ajritilghanliqini bildürgen.

“Xitay xewerliri” torining ashkarlishiche, qeshqer wilayetlik yéza-kentlerni güllendürüsh idarisi qeshqer wilayitidiki 201 yéza-kentning “Ishleshke we olturushqa qolayliq yéza-kent” berpa qilish qurulushidiki ülgilik sinaq nuqtisigha kirgüzülgenliki we uninggha 200 milyon yüen ajritilidighanliqini éytqan. Xewerde yopurgha nahiyesining séyek yézisi yoqiriqi bulman kenti xitayning “Qolayliq yéza-kent qurulushi” diki ülgilik sinaq nuqtilirining biri ikenlikini bildürgen. Közetküchilerning éytishiche, emeliyette bu qurulush Uyghur déhqanlirini yenimu ilgirilep shexsiy mülük we térilghu yer-zéminliridin ayrip, ularni omumiyyüzlük ishlemchilerge aylandurup, xitay karxanilirigha baghlash pilanining bir parchisi iken.

Uyghur rayonining weziyitige yéqindin diqqet qilip kéliwatqan mutexessislerning ilgiri sürüshiche, xitay da'iriliri bu ‍arqiliq Uyghur jem'iyitini parchilash, ularni téximu asan kontrol qilish we jem'iyettiki tesirini téximu ajizlitishni meqset qilmaqtiken. Xitay da'irilirining taratqulargha éytishiche, yopurgha nahiyesining yoqiriqi bulman kentining özidinla 925 neper emgek küchi ishqa orunlashturulghan. Qeshqerdiki yerlik da'iriler 200 milyon yüen mebleghning yoqiriqi 201 ‍ülgilik yéza-kentte ishlepchiqirish, ul esliheller we ishqa orunlashturushqa serp qilinidighanliqini éytqan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.