Shinjang ishlepchiqirish-qurulush armiyesi bu yil pütün xitay miqyasidin 698 neper oqutquchi qobul qilidiken

Shinjang ishlepchiqirish-qurulush armiyesi yéqinda pütün xitay miqyasigha uqturush chiqirip, 2016-yilida herqaysi polk-meydanlardiki ottura-bashlan'ghuch mekteplerge jem'iy 698 neper oqutquchi qobul qilidighanliqini bildürgen.

Tengritagh torining ilgiri sürüshiche, shinjang ishlepchiqirish-qurulush armiyesining axbarat ishxanisi bu heqte omumiy uqturush chiqirip, 2016-yilida bingtu'en'ge qarashliq herqaysi polk we meydanlarning mejburiyet ma'aripida oqutquchilarning jiddiy kemchil boluwatqanliqini, buning üchün alahide ish orni pilani yaritip pütün memlikettin oqutquchi qobul qilidighanliqini élan qilghan.

Igilinishiche, xitay hökümiti 1990-yillardin buyan Uyghur élini baza qilghan shinjang ishlepchiqirish-qurulush armiyesige zor kölemde iqtisadiy sélinma sélishqa bashlighan. Shuning bilen bir waqitta yene shinjang ishlepchiqirish-qurulush armiyesini Uyghur élining muqimliqini saqlash, chégra bixeterlikini qoghdashtiki alahide küchke aylandurush istratégiyesini yolgha qoyghan.

Netijide “Yérim herbiy, yérim déhqan” xaraktéridiki ishlepchiqirish-qurulush bingtüeni xitay hökümitining hessilep meblegh sélishi netijiside iqtisadiy jehettin téz tereqqiy qilip, Uyghur aptonom rayoni bilen riqabetlisheleydighan ölke ichidiki ölke derijilik orun'gha aylan'ghan.

Közetküchiler, yerlik milletler nopusi intayin az nisbetni igileydighan ishlepchiqirish-qurulush bingtu'enide ottura-bashlan'ghuch mektepler üchün éhtiyajliq boluwatqan oqutquchilarni pütün xitay miqyasidin jelp qilishning özi bu yerdiki asasiy ma'aripning xitaychilashturulghanliqining alamitidur, dep qarimaqta.