Xitay yéqinqi 10 yilda 30 milyon adem qétimdin artuq yéza emgek küchini “Yötkep ishqa orunlashturghan”

Muxbirimiz erkin
2022.08.29
Share on WhatsApp
Share on WhatsApp

Uyghur aptonom rayonluq partkom 27-awghust ürümchide “Xitayning 10 yili: shinjang” namliq axbarat yighini ötküzüp, Uyghur élide yéqinqi 10 yilda 30 milyon adem qétimdin artuq yéza emgek küchini yötkep ishqa orunlashturghanliqini élan qilghan. Uyghur aptonom rayonluq partkomning sékrétari ma shingrüy yétekchilik qilghan axbarat yighinida, u Uyghur élidiki emgek iqtidarigha ige yéza-bazar emgek küchlirini muqim ishqa orunlashturushni asasen ishqa ashurghanliqini éytqan. Uning éytishiche, ‍ötken 10 yil mabeynide rayondiki yéza emgek küchlirining sirtqa chiqip ishqa orunlishishini 30 milyon 90 ming 880 adem qétimgha yetküzgen.

Bu qétimqi axbarat yighini b d t kishilik hoquq aliy komissari mishél bachélét xelq'ara jem'iyetning u 31-awghust wezipisidin ayrilishtin burun, b d t mutexessislirining Uyghurlar heqqide teyyarlighan doklatini élan qilish toghrisidiki qattiq bésimigha uchrawatqan bir waqitta ötküzülgen. “Xitay xewerliri” torining uchuridin melum bolushiche, ma shingrüy axbarat yighinda, xitayning bezi gherb hökümetliri we parlaméntliri teripidin “Irqiy qirghinchiliq” dep eyiblen'gen rayondiki qattiq basturush siyasitini aqlap, bu siyaset “Tengri téghining shimali we jenubidiki hemme jayda yéngi muqimliq, inaqliq we küchlük tereqqiyat keypiyati peyda qilghanliqi” ni ilgiri sürgen.

Uning éytishiche, bu jeryanda milletler öz ara gireliship yashaydighan 4783 kent, ijtima'iy rayoni, 9923 ahale rayoni qurup chiqilghan. Ma shingrüy yene Uyghur élining jenubidiki xoten, qeshqer, qizil su, aqsu qatarliq 3 wilayet, bir oblastta yeslidin tartip toluq otturighiche 15 yilliq heqsiz ma'aripni ishqa ashurghanliqini bildürgen.

Lékin b d t kishilik hoquq mutexessisiliri “Yötkep ishqa orunlashturush” xitayning Uyghurlargha yürgüzgen mejburiy emgek shekli ikenlikini, shundaqla adriyan zénzge oxshash chet'el tetqiqatchiliri 15 yilliq heqsiz ma'aripning Uyghur perzentlirini a'isidin ayrip assimilatsiye qilish programmisi ikenlikini bildürmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.