Mishél bachélétning xitay sepiri harpisida herqaysi puqrawiy teshkilatlar öz telipini otturigha qoydi

Muxbirimiz eziz
2022-04-19
Share

Birleshken döletler teshkilati (b d t) kishilik hoquq aliy kéngishining re'isi mishél bachélét may éyida xitay sepirige mangidighan bolup yéqinda Uyghurlar, tibetler, xitaylar, xongkongluqlar qatarliqlarning 70 nechche puqrawiy teshkilati kolléktip mektup teyyarlap, özlirining bu qétimqi seper heqqidiki teleplirini yetküzdi.

Dunya Uyghur qurultiyi (d u q) ning tor bétide in'glizche we xitayche élan qilin'ghan bu ochuq mektupta xitay hökümitining Uyghur diyaridiki qirghinchiliq qilmishliri alahide eskertilish bilen birge mezkur kéngesh teyyarlap chiqqan Uyghur diyari heqqidiki doklatni seperdin ilgiri élan qilish, herqaysi milletlerning teshkilatliri bilen uchriship ularning pikirlirini anglap béqish, shuningdek bu qétimqi seper we tekshürüshning resmiyetchilik bolup qalmasliqigha képillik qilish qatarliqlarni telep qilghan.

Dunya Uyghur qurultiyining re'isi dolqun eysa bu heqte söz qilip “Mishél bachélét xitay sepiridin ilgiri Uyghur teshkilatliri bilen körüshüshi, shuningdek sherqiy türkistandiki qirghinchiliq heqqide shahitlarning bayanlirini anglap béqishi lazim. Chünki bu zulumlargha uchrighuchi xelq topi bilen uchrishish ular aldin oylishidighan mesililerdin bolushi lazim” dégen.

Nöwette mishél bachélétning bu qétimqi xitay sepirining netijisiz axirlishidighanliqi heqqide türlük pikirler otturigha chiqiwatqan bolup, xitay hökümitimu buning peqet “Ziyaret” bolidighanliqini alahide tekitlep kelmektiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet