Уйғурлар чәтәл мухбирлириға өз дәртлирини ейтишни халимиди

Русийәниң “ислам хәвәрлири” дәп аталған учур агентлиқиниң йезишичә, уйғур дияридики уйғур мусулманлири чәтәл мухбирлириға өзлиригә қарита хитай коммунистик түзүми тәрипидин келиватқан тәқибләшләр һәққидә сөзләштин өзлирини қачурған.

Бу хәвәр оттура асияда рус тилида тарқитилидиған “уйғур тодәй” торидиму елан қилинған болуп, хәвәрдин мәлум болушичә, йеқинда уйғур диярида зиярәттә болған пакистанлиқ мухбир васим аббаси өзиниң уйғур диярини зиярәт қилиш җәрянида уйғурлар билән сөзлишип, уларниң әһвали һәққидә қарашлирини игиләшкә тиришқан болсиму, бирақ қорқуп кәткән уйғурлар униң билән сөзлишишини рәт қилғанлиқи, һәтта униң билән сөзлишишни халиған икки яш уйғурму раст гәпни қилиштин өзини қачурғанлиқини язған.

Бу пакистанлиқ журналист мәзкур кишиләрниң өзлири дуч келиватқан һәқиқий әһвал һәққидә созлимигәнликиниң сәвәбини көрситишкә тиришқан болуп, у үрүмчи кочилирида көп сандики сақчиларниң даим чарлайдиғанлиқи, кочиларниң пат-патла тосуветилидиғанлиқи, һәтта мәсчитләрдиму бихәтәрлик хадимлириниң барлиқи вә башқиларни язған.

“ислам хәвәрлири” агентлиқиниң йезишичә, мәзкур пакистанлиқ журналист өзиниң үрүмчи кочисида нәччә онлиған уйғур билән сөзлишишкә тиришқан болсиму, бирақ улар униң тәлипини тәкәллуп билән рәт қилғанлиқи вә сөз темисини өзгәрткәнликини вә яки болмиса, “һәммиси яхши” дәпла җаваб бәргәнликини баян қилған.