Mayk jonson: “Uyghurlar izchil zulumgha uchrawatidu! ”

Amérika paytexti washin'gton shehiride chaqirilghan 2024-yilliq “Xelq'ara diniy erkinlik aliy kéngishi” ning ikkinchi künidiki yighinida amérika awam palatasining re'isi, amérika siyasiy sahesidiki üchinchi nomurluq shexs mayk jonson (Mike Johnson) alahide söz qilghan.

U diniy erkinlik mesilisining nöwettiki depsende bolush ehwali heqqide toxtilip, buning eng tipik misali qatarida Uyghurlarni tilgha alghan. Shuning bilen birge Uyghur diyarida yüz bériwatqan türlük basturush we kontrolluq tedbirlirini sanap ötüp, nöwettiki mejburiy emgek, mejburiy tughmas qiliwétish we mejburiy hamile chüshürüsh qilmishlirini eyibligen.

U sözide xitay hökümiti Uyghur diyarida ijra qiliwatqan türlük qebih siyasetlerge qarita küchlük tedbir élishning zörürlükinimu alahide eskertken. Shundaqla alliqachan resmiy qanun'gha aylan'ghan “Uyghur mejburiy emgikining aldini élish qanuni” ni téximu keng da'irige tetbiqlash kéreklikini, shu arqiliq Uyghur diyarida hélihem dawam qiliwatqan qirghinchiliqqa cheklime qoyushni tekitligen.

Bu qétimqi yighinda amérika siyasiy sahesidiki köpligen yuqiri derijilik emeldarlar ayrim-ayrim söz qilghan bolup, diniy étiqad sahesidiki depsendichilik heqqide qilghan sözliride birdek Uyghurlarni alahide misal qilip alghan. Awam palatasining re'isi mayik jonsonning sözlirimu shu qatarda Uyghurlar mesilisining amérika hökümiti üchün muhim témilardin boluwatqanliqidin bésharet, dep qariliwatqanliqi melum.