Uyghur rayonida yéngi yuqumdarlar dawamliq köpeymekte

“Xitay xewerliri tori” ning 11-awghust künidiki xewiridin melum bolushiche, 8-ayning 10-küni 24 sa'et ichide Uyghur rayonida köpeygen yéngi yuqumdarlar sani 380 ge yetken. Buning ichide ghulja shehiride 284, qomul shehiride 1, sanji qutubi nahiyeside 27, turpan shehiride 4, altay  shehiride 2, ürümchi shehiride 53, bortala shehiride 2, xoten shehiride 1, korla shehiride 3, qaghiliq nahiyeside 2 yuqumdar köpeygen.

Xitay taratqulirining melumatlirigha qarighanda, 7-ayning 30-küni ili oblastida késellik alamiti yoq tajsiman wirus yuqumdari bayqalghandin tartip hazirghiche 916 yuqumdar tekshürüp éniqlan'ghan. Buning ichide ghulja shehiride eng köp bolup 689 adem, ürümchi shehiride 91 adem yuqumlan'ghan. Uningdin qalsa ghulja nahiyeside 42 adem, sanji qutubi nahiyeside 38 adem yuqumlan'ghan.

Nöwette Uyghur rayonidiki yuqum weziyiti xélila éghir bolup, 8-ayning 10-küni Uyghur aptonom rayonluq partkom sékritari ma shingrüy, aptonom rayonning re'isi erkin tuniyaz qatarliqlar ürümchi sheherlik yuqumluq késelliklerning aldini élish we kontrol qilish merkizige bérip, shi jinpingning “Yuqumni nölge chüshürüsh” siyasitini qet'iy ijra qilishni telep qilghan. Bu ehwalda jaylardiki xelqning turmushi we kündilik pa'aliyetliri tamamen palech halgha chüshüp qalidighanliqi, hetta shangxeyde yüz bergen qattiq qamaldin peyda bolghan acharchiliq we ölüm-yétim paji'esining tekrarlinidighanliqi endishe peyda qilmaqta iken.   

Xitay sehiye tarmaqliri wirus tarqalghan rayonlarni “Éghir, ottura hal, yenggil” dep üchke bölüp kontrol qiliwatqan bolup, yuqum  éghir rayondiki yollarni qamal qilip, ahalilerni öydin chiqarmighan؛ emma sayahetchilikni qoldin bermeslik üchün xilmu xil étibar bérish siyasetlirini yolgha qoyghan.

Xitay da'iriliri bu wirusning kélish menbesini chet eldin kirgen dégen bolsimu, sayahetchilerning köp qismining xitay ikenlikini nezerde tutqanda bu qarashning put tirep turalmaydighanliqi éniq. “Jenubiy xitay etigenlik pochtisi” gézitining xewirige qarighanda, Uyghur rayonigha barmaqchi bolghan xongkong parlamént ezaliri u rayondiki yuqum ehwalining éghirliqi tüpeylidin pilanini arqigha sürgen.