Finlandiye bash ministiri lagérlardiki Uyghur ayalliri uchrawatqan xorluqqa küchlük inkas qayturdi

Muxbirimiz irade
2021-02-04
Share

Finlandiye bash ministiri sanna marin xanim Uyghur ayallirining lagérlarda sistémiliq basqunchiliq we jinisiy xorluqqa uchrawawatqanliqini qattiq eyiblidi.

U 3-féwral künidiki tiwittér uchurida BBC ning Uyghur ayalliri heqqidiki xewirini isharet qilip mundaq yazghan: "Xelq'ara jem'iyet xitay hökümitining kishilik hoquqni depsende qilip, az sanliq milletlerge qiliwatqan bésimini körmeske séliwalmasliqi kérek. Soda we iqtisad bundaq wehshiyliklerni körmeske séliwélishimiz üchün bahane bolmasliqi kérek. Kishilik hoquq choqum ikki tereplimilik we köp tereplimilik muzakirilerning eng merkizi noqtisi bolushi kérek."

Finlandiye bash ministiri sanna marin xanimning yuqiriqi bayanati chet ellerdiki Uyghur jama'itini xursen qildi.

Bundin bashqa yene amérikaning birleshken döletler teshkilatidiki sabiq elchisi we jenubiy karolina shitatining bashliqi nikkiy héyli xanimmu tiwittérda lagér shahiti tursun'ay ziyawudunning qorqunchluq sergüzeshtiliri heqqide toxtilip mundaq dégen: "Bizning Uyghurlargha xitayning mes'uliyitini sürüshtürüp bérish qerzimiz bar. Biz hemmimiz yüz bériwatqan shunche qorqunchluq ishlargha dunya süküt qiliwatidu, dégen qarashta. Biz 'menggü tekrarlanmaydu' dep wede bergen iduq."

U tiwittérdiki bu uchurini "Biz Uyghurlar bilen bir septe" namliq xeshteg arqiliq hembehirligen.

BBC Ning Uyghur ayallirining qorqunchluq xorluqqa uchrawatqanliqi heqqidiki xewerge yene sabiq amérika prézidénti donald trampning oghlimu tiwittérda "Dunya jama'itining ghezipi nede?" dep inkas qayturghan.

Tursun'ay ziyawudunning BBC da bergen guwahliqi dunya axbaratlirida zor derijide ghulghula qozghidi. Yuqiridikidek gherb elliridiki hökümet emeldarliri we siyasetchiliri xitayning zulumini qattiq eyiblewatqan bolsimu, emma hazirghiche birer musulman döliti, türkiye yaki ottura asiyadiki türk döletliridin sada chiqmidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet