Уйғурлар дияриға хитайдин хизмәтчи қобул қилиш долқуни қозғалди

Мухбиримиз әзиз
2020-04-15
Елхәт
Пикир
Share
Принт

Хитай һөкүмәт ахбаратлириниң мәлуматлириға қариғанда хитай маарип тармақлири 2020-йилиға қарита ичкири өлкиләрдин 3500 нәпәр алий мәктәп ‍оқуғучисини «ғәрби қисим мулазимәтчилири» дегән намда уйғурлар дияриға хизмәткә қобул қилидиғанлиқини җакарлиған.

«Тәңритағ тори» ниң 15-апрелдики хәвиридә ейтилишичә, бу қетим қобул қилинидиғанлар асасий маарип, йеза игилик, сақлиқни сақлаш, асасий қатлам рәһбәрлики қатарлиқ саһәләргә қобул қилинидикән. Уларниң хизмәт муддити бир йилдин ‍үч йилғичә болидиған болуп, бу мәзгилдә асасий мааштин сирт нурғунлиған қошумчә ярдәм пуллириниң берилидиғанлиқи алаһидә тәкитләнгән. Әгәр үч йил хизмәт қилғандин кейин аспирантлиққа имтиһан бәрсә уларни етибар билән қобул қилидиғанлиқиму әскәртилгән.

Бу хилдики «ғәрбий қисим мулазимәтчилири» қобул қилиш еланини уйғурлар дияридики биңтуәнләргә қарашлиқ тармақларму чиқарған болуп, униңда бу хилдики хитай оқуғучиларни уйғурлар дияриға келип хизмәткә чақириқ қилиш долқуниниң 2003-йилидин башлап иҗра қилиниватқанлиқи, бу җәрянда 12 миңдин артуқ хитай оқуғучиниң уйғурлар дияриға келип хизмәткә орунлашқанлиқи ейтилиду.

Һалбуки, уйғурлар дияридики алий мәктәпни пүттүргән миңлиған уйғур оқуғучилар, җүмлидин магистирлиқ унванлири алған нурғун яшлар ишсизлиқ яки лагерларға қамилиш қисмәтлиригә дуч келиватқан болса, йәнә миңлиған уйғур деһқан яшлири «ешинча әмгәк күчлирини намратлиқтин қутулдуруш» дегән намда ичкиридики хитай завутлириға әрзан баһалиқ әмгәк болуп йөткиливатқанлиқи мәлум.

Уйғурлар дияридики вәзийәттин хәвәрдар анализчилар бу һәқтә тохтилип буниң маһийәттә хитай һөкүмитиниң өткән йәтмиш йилдин буян давам қилип келиватқан нопус көчүрүш истратегийәсиниң бир қисми икәнликини тәкитлиди. Америкадики мустәқил көзәткүчи елшат һәсән бу һәқтә пикир қилип «рошәнки, бу хитай оқуғучилар бизниң вәтинимизгә таҗавузчи һакимийәтниң мустәмликичилик сиясәтлирини иҗра қилғучи әмәлдарлири болушқа келиду. Бу һал манҗуларниң чиң сулалиси дәвридин тартип мушу тәриқидә давам қилип кәлмәктә» деди.

Пикирләр (0)
Share
Толуқ бәт