Özbékistanning xitayda turushluq bash elchisi Uyghur rayonida ziyarette bolghan

Özbékistanning xitayda turushluq bash elchisi ferhat arziyéf ötken heptining axiri Uyghur rayonida ziyarette bolghan. Xitay taratqulirining xewerliride, Uyghur aptonom rayonluq partkom sékrétari ma shingrüy bilen Uyghur aptonom rayonluq hökümetning re'isi erkin tuniyazning 25-dékabir küni ürümchige kelgen ferhat arziyéf bilen körüshkenliki we söhbette bolghanliqi qeyt qilinmaqta. Lékin bu heqtiki xewerlerde, arziyéfning ürümchini ziyaret qilishidiki konkrét meqsiti we küntertipige da'ir tepsilatlar tilgha élinmighan. Uning b d t kishilik hoquq kéngishi kéler yili 1-ayda xitayning qerellik kishilik hoquq xatirisini bahalap chiqidighan bir waqitta ürümchige kélishi diqqet qozghimaqta. Özbékistan b d t kishilik hoquq kéngishining her qétimliq yighinida xitayning Uyghur rayonidiki siyasitini qollap kelgen.

  “Shinjang géziti” ning xewer qilishiche, ma shingrüy 25-dékabir arziyéf bilen körüshkende uninggha Uyghur rayonining “Xitay-özbékistan omumyüzlük istratégiyelik shériklik munasiwitini téximu chongqurlashturushi üchün töhpe qoshidighanliqi” ni éytqan. Uning tekitlishiche, yéqindin béri ikki terep bir qatar tedbirlerni qollinish arqiliq öz ara “Éksport-import sodisini körünerlik ashurghan” . Ma shingrüy mundaq dégen: “Biz ikki dölet rehbiri hasil qilghan muhim ortaq tonushlarni toluq ijra qilip, özbékistan bilen bolghan iqtisadiy, soda we bashqa sahelerdiki meblegh sélish hemkarliqini téximu yuqiri pellige kötürimiz. Yéngi dewrde xitay-özbékistan uniwérsal istratégiyelik shériklik munasiwitini chongqurlashturushqa yéngi töhpilerni qoshimiz” .

  “Shinjang géziti” ning xewiride, arziyéfning özbékistan-xitay otturisidiki hemkarliqning muhim yönilishi we muhim sahelirini chöridigen halda her ikki terepning ikki dölet rehbiri hasil qilghan muhim ortaq tonushni ijra qilishni ümid qilidighanliqini bildürgenliki qeyt qilinmaqta. Gherb döletliride Uyghur mejburiy emgiki mehsulatlirini cheklesh yaki bayqut qilish küchiyiwatqan bolsimu, lékin bu yil mezkur rayonning ottura asiya döletlirige qaratqan éksportining jiddiy köpeygenliki melum.