Өзбекистан вә хитай археологлири бирликтә қәдими шәһәр харабисини қазди

Мухбиримиз үмидвар
2017-01-15
Share

Хитай билән өзбекистан археологлири бирлишип, пәрғанә вадисидики қәдимки шәһәр харабисида археологийилик қезиш елип барған.

Оттура асия ториниң бу һәқтики учуридин мәлум болушичә, икки дөләт археологлири пәрғанә вадисиниң озбекистан тәвәсигә җайлашқан қисмидики миңтөпә шәһири харабисида қезиш елип барған болуп, икки әл алимлири һәмкарлиқни 2012-йилидин етибарән давамлаштуруп кәлмәктә.

Шәһәр харабисини қезиш вә чиққан буюмларни тәтқиқ қилиш арқилиқ алимлар миңтөпәдики бу қәдимки шәһәрниң 2000 йиллар илгири пәқәт вақитлиқ һәрбий мудапиә қорғини болупла қалмастин бәлки йәнә, әйни вақиттики чоң шәһәрләрниң бири болғанлиқини бекиткән.

Улар харабидин шәһәр дәрвазиси, ички қәлә, қәбристанлиқ, ташқи шәһәр сепили, һүнәрвәнчилик нуқтиси вә башқиларниң излирини тапқан.

Бу тәтқиқатқа қатнашқан хитай тәрәп мутәхәссиси өзбекистан археологлириниң шәһәр харабисиниң йәр үстидики қисми билән яхши тонуш икәнликини, хитай тәтқиқатчилириниң болса харабиниң йәр астидики қисмиға коп көч чиқарғанлиқини билдүргән,

Миңтөпә әнҗан шәһиригә йеқин орунға җайлашқан болуп, бу җайлар қәдимки тарихи мәнбәләрдә қәйт қилинған давән дөлитиниң земинлиридур. Хитай тарихи мәнбәлиридә хатирилишичә,миладийидин илгирики 104-99-йиллири арисида ғәрбий хән сулалиси билән давән дөлити арисида уруш партлиған болуп, ғәрбий хән сулалиси генерали ли гуаңли бу дөләттин самави атларни қолға чүшүрүш үчүн таҗавуз қилип барған болсиму, әмма дәсләптә қаттиқ мәғлуп болған, кейинки қетимлиқ урушлар нәтиҗисидә икки тәрәп арисида сүлһи түзүлгән иди.

Бу қетимқи икки дөләт алимлириниң археологийилик қезишлири қәдимки давән дөлити һәққидики тәтқиқатларни күчәйтиш ролини ойнайдикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт