Вийетнам айропортлириниң компютер системиси интернет һуҗумиға учриди

Вийетнамниң қатнаш министирлики интернет һуҗумиға хитай тор бузарлири мәсул икәнликни билдүргән.

“вашингтон вақит гезити” ниң хәвиригә қариғанда, һуҗум хуҗимин шәһиридики нойбай вә тасонһат айропортлирида бирдәк көрүлгән.

BBC Ниң хәвәр қилишичә, бу қетимқи һуҗумда йәнә вийетнам һава йоллириниң тор бетиму қисқа муддәт тәсиргә учриған.

Мәлум болушичә, интернет һуҗуми йүз бәргән айропортниң бири йәни тасонһат пәйшәнбә күни бир хитай йолучи һақарәтлигән айродром икән.

Хәвәргә қариғанда, 28 - июл гуаңдуңлуқ бир хитай йолучи вийетнамға кирәшидә вийетнам таможна хадимлири униң паспортиға сәт гәптин бирини йезип қайтуруп бәргән.

Хитай һөкүмити 2012 - йили тарқатқан йеңи паспортлириниң бетигә җәнубий деңизниму өз ичигә алидиған бир хәритини сус шәкилдә бесип киргүзгән иди.

Бу сәт гәп дәл паспортниң шу хитай хәритиси бесилған бетигә йезилған икән.

Хитай һөкүмити вийетнамдин мәзкур вәқә үстидә тәкшүрүш елип беришни тәләп қилған. Вийетнам буни тәкшүрүшидиғанлиқини билдүргән.

Хитай җәнубий деңизниң мутләқ көп қисмини өзиниң, дәп елан қилип деңизниң парасел вә спрател араллири тәвәсидә бир қисим сүний араллирини ясиған вә һәрбий қораллирини орунлаштурған иди.

Әмма хитайниң бу һәрикити вийетнам, малайсия, бируней вә филиппин қатарлиқ дөләтләрниң қаршилиқиға учриған.

12 - Июл хәлқара сот филиппин хитай үстидин сунған деңиз тәвәлики дәвасиға қарап чиқип, хитайниң мәзкур деңизидики игилик һоқуқ тәлипиниң тарихий асасий йоқлуқини җакарлиған. Бу хитайниң наразилиқини қозғиған иди.