Meblegh salghuchi guruppilar wolkiswagéni Uyghur mejburiy emgikini ishletkenliki üchün tenqid qilghan

Washin'gtondin muxbirimiz uyghar teyyarlidi
2024.02.27

Yaponiyening  “Asiya iqtisad xewerliri” (Nikkei Asia) gézitining 2024-yili 2-ayning 22-künidiki xewirige asaslan'ghanda, gérmaniyening dangliq aptomobil shirkiti wolkiswagénning (Volkswagen) Uyghur mejburiy emgiki bilen biwasite chétishliq ikenliki tüpeyli  meblegh salghuchi guruppilar we shirketler wolkiswagénni tenqid qilghan we Uyghur élidiki tarmaq shirkitige  a'it bolghan paychékini sétiwétishini telep qilghan.

Mezkur xewerde déyilishiche,  wolkiswagénning frankfurt pay chéki 2022-yili 11-ayning béshidin bashlap  2024-yili 2-ayning 21- künige qeder %13  chüshken.

  Wolkiswagén aptomobil ishlepchiqirish guruhi uzundin buyan Uyghur mejburiy emgiki seweblik eyiblinip kelgen. Emma wolkiswagén özlirining Uyghur mejburiy emgiki bilen héchqandaq munasiwiti yoqlighini ilgiri sürüp, ürümchidiki zawutini taqashni ret qilghan we xitaydiki tijaritini burunqidekla dawamlashturghanidi.

2024-Yili 2-ayning 13-küni, kommunizm qurbanliri xatire fondining aliy tetqiqatchisi doktor adriyan zénzning Uyghur mejburiy emgiki heqqidiki yéngi tetqiqat netijisi jeymistown fondi (Jamestown Foundation) torida élan qilin'ghan bolup, uningda wolkiswagénning Uyghur mejburiy emgiki bilen biwasite chétishliq ikenliki ashkarilan'ghanidi.

  Wolkiswagénning Uyghur mejburiy emgiki bilen biwasite chétishliq ikenliki ashkarilan'ghandin kéyin, dunya Uyghur qurultiyi bayanat élan qilip, wolkiswagénni sherqiy türkistandin chiqip kétishke chaqirghan, élan qilghan bayanatta mundaq déyilgenidi:  “Wolkiswagén uzundin buyan Uyghurlarning kishilik hoquq depsendichilikige chétishliq ikenlikini inkar qildi we mes'uliyettin özini qachurup keldi. Lékin, doktor adriyan zénz wolkiswagénning Uyghur mejburiy emgiki bilen chétishliq ikenlikini deliller bilen ispatlidi. Bu, wolkiswagénning sherqiy türkistandin chékinishi üchün burulush nuqtisi bolushi kérek.”

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.