Ваң йи байден билән ши җинпиңниң сан-франсискодики учришиши “асанға тохтимайдиғанлиқи” ни билдүргән

Вашингтондин мухбиримиз әркин тәйярлиди
2023.10.30

Дуняниң диққити америка президенти җов байденниң келәр ай сан-франсиско шәһиридә хитай рәиси ши җинпиң билән болидиған учришишиға буралған бир вақитта, хитай ташқи ишла министири ваң йи байден-ши учришишиниң ундақ “асанға тохтимайдиғанлиқи” ни ейтқан. Ваң йи өткән һәптә вашингтонда зиярәттә болуп, америка ташқи ишлар министири билинкен, дөләт хәвпсизлик мәслиһәтчиси җек суливан билән сөһбәт ‍өткүзгән һәм президент байденниң қобул қилишиға еришкән. Зиярәттә, һәр икки тәрәп асия-тинч окян иқтисадий һәмкарлиқ мунбириниң 11-айда сан-франсиско шәһиридә өткүзүлидиған башлиқлар йиғинида, икки дөләт рәһбириниң айрим учришиши үчүн һазирлиқ елип беришқа келишкәниди.

Лекин “сиясәт” гезитиниң хәвәр қилишичә, хитай ташқи ишлар министирлиқиниң 29-өктәбир елан қилған мәлуматида ваң йиниң икки тәрәп учришишиға елип баридиған йолниң ундақ “асанға тохтимайдиғанлиқи” ни ейтқанлиқи билдүрүлгән.

Ваң йиниң 26- вә 27-өктәбир күнлири вашингтонға қилған зиярити америка-хитай мунасивәтлири американиң хитайға юқири техника екиспортини қаттиқ контрол қилиши, хитайниң җәнубий вә шәрқий деңиздики һәрикити, хитайниң америка карханилириға тутқан муамилиси, кишилик һоқуқ қатарлиқ мәсилиләр сәвәбидин кәскинлишип кәткән, болупму украина уруши вә исраилйә-хамас тоқунуши мунасивәтләрни техиму назуклаштуривәткән бир вақитта елип берилғаниди.

“сиясәт” гезитиниң билдүрүшичә, хитай ташқи ишлар министири ваң йи йәнә икки дөләтниң “ички ишларға арилишишни бикар қилиши, кашилиларни йеңиши, пикир бирликини күчәйтиши, нәтиҗиләрни гәвдиләндүрүши керәклики” ни ейтқан. Бирақ у “ички ишларға ‍арилишишни тохтитиш”, “кашилиларни йеңиш” дегәндә немиләрни көздә тутқанлиқиға чүшәнчә бәрмигән. Билинкен, ваң йиниң бу қетимлиқ вашингтонға қилған зияритидә өткүзгән сөһбәттә, хитайниң уйғур районидики кишилик һоқуқ дәпсәндичиликигә болған әндишисини оттуриға қойғаниди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.