хитай мәмликәтлик сиясий мәслиһәт кеңишиниң рәиси ваң яң, 4-март күни бейҗиңда башланған сиясий кеңәшниң мәмликәтлик йиғинида хизмәт доклати берип, америка билән явропаниң тәйвән, хоңкоң вә уйғур елигә мунасивәтлик қанунлириға қарита хитайниң игилик һоқуқини қәтий қоғдайдиғанлиқини билдүргән. бу, компартийәниң өткән йили 10-айдики мәмликәтлик қурултийида сиясий бюрониң даимий әзалиқидин қелип қалған хитайниң қошумчә "шинҗаң хизмити" гә мәсул мәзкур рәһбириниң ахирқи қетим сиясий кеңәшниң мәмликәтлик йиғинида хизмәт доклати беришидур.
ваң яң хитай мәмликәтлик сиясий кеңишиниң рәисилик вәзиписини өтигән өткән бәш йилда, хитай компартийәси "мәркизий шинҗаң хизмити рәһбәрлик гурупписи" ниң мәсули болуш сүпитидә уйғур районидики қәбиһликләргә җавабкар, дәп қаралған хитай рәһбәрлириниң бири болған.
тәйвән мәркизи ахбарат агентлиқиниң хәвәр қилишичә, ваң яң хизмәт доклатида хитайниң тәйвән, хоңкоң вә уйғурлар мәсилисидики мәйданини қайта тәкитләп, американиң чиқарған қанунлирини "америка вә явропаниң тәйвәнгә, хоңкоңға вә шинҗаңға мунасивәтлик ойдурма қанунлири" дәп атап, буларға вә сабиқ америка кеңәш палата рәиси нәнсий пелусиниң тәйвәнни зиярәт қилиши қатарлиқларға қарита қаттиқ ипадә билдүргән. у, "хитайниң игилик һоқуқи, бихәтәрлики вә тәрәққияти мәнпәәтини қәтий қоғдайдиғанлиқи" ни ейтқан. хитайниң бу нөвәтлик мәмликәтлик сиясий мәслиһәт кеңишиниң йиғинида уйғур аптоном районидин җәмий 36 вәкил қатнашқан болуп, уларниң йиғинда оттуриға қойған тәклип-пикирлириниң көпинчиси "шинҗаңни мәдәнийәт билән озуқландуруш", "шинҗаңда җуңхуа миллити ортақ еңини шәкилләндүрүш" кә мунасивәтлик мәсилиләр болған.
"шинҗаң гезити" ниң хәвиридә көрситилишичә, "шинҗаң вәкили" дилнар абдулла һөкүмәт хизмити доклатини махтап, бу доклатта "кишиләрниң мәниви вә мәдәнийәт турмушини бейитиш" тилға елинғанлиқи, "бу, кишиләрниң мәниви күчини ашуридиған, шинҗаңни мәдәнийәт билән озуқландурушқа актип төһпә қошидиған техиму есил әсәрләрни барлиққа кәлтүридиғанлиқи" ни ейтқан. һалбуки, чәтәл тәтқиқатчилириниң қәйт қилишичә, "шинҗаңни мәдәнийәт билән озуқландуруш қурулуши" хитайниң уйғур районини хитайлаштуруш һәрикитиниң бир парчиси икән.