Америка дөләт мәҗлисидики җумһурийәтчиләр ваң яң, чен чүәнго қатарлиқ хитай әмәлдарлирини җазалашни тәләп қилди

Америка дөләт мәҗлисиниң 150 нәпәр җумһурийәтчи әзаси дөләт бихәтәрлик истиратегйәси һәққидә доклат тәйярлап, трамп һөкүмитиниң кишилик һоқуқни дәпсәндә қиливатқан хитай әмәлдарлирини “қаттиқ җазалиши” ни тәләп қилған. Доклатта җазалаш нишани хитайниң “шинҗаң сиясити” гә мәсул сиясий бюро даимий әзаси ваң яң, “хоңкоң сиясити” гә мәсул сиясий бюро даимий әзаси хән җең, уйғур аптоном районлуқ партком секретари чен чүәнго қатарлиқ әмәлдарлирини өз ичигә алған.

Доклатта тәкитлинишичә, бу әмәлдарларға “мисли көрүлүп бақмиған әң қаттиқ ембарго йүргүзүлүп, қаттиқ җазалиниши керәк” икән. “американи күчәйтиш вә йәр шари тәһдитләргә тақабил туруш” намлиқ 115 бәтлик мәзкур доклатни “җумһурийәтчиләр тәтқиқат комитети” тәйярлиған. “җумһурийәтчиләр тәтқиқат комитети” болса америка дөләт мәҗлисиниң 150 нәпәр җумһурийәтчи әзасидин тәшкил тапқан. Доклат 5 бөләккә бөлүнгән болуп, униң 3-бөлүки хитайниң кишилик һоқуқ дәпсәндичиликини тосушқа қаритилған.

Униңда, ваң яң, хән җең, хитай җамаәт хәвпсизлик министири җав кеҗи, уйғур аптоном районлуқ партком секретари чен чүәнго, тибәт аптоном районлуқ партком секретари ву йиңҗйе, хоңкоң-макав ишханисиниң мудири шя бавлоң, хоңкоң мәркизи һөкүмәт алақилишиш ишханисиниң башлиқи лу хуйниң вә хитай бирликсәп бөлүминиң барлиқ әмәлдарлирини җазалаш тәләп қилинған. Доклатта тәкитлинишичә, бу кишиләр “шинҗаң, тибәт вә хитайниң башқа җайлиридики кишилик һоқуқ дәпсәндичиликлиригә җавабкар болуши керәк” икән.