Ваң яң уйғур райони зияритидә “муқимлиқ тәдбирлиридә тәврәнмәслик” ни тәкитлигән

Мухбиримиз әркин
2020.06.15

Хитайниң “шинҗаң ишлири” ға мәсул юқири дәриҗилик әмәлдари ваң яң өткән һәптә уйғур аптоном районини зиярәт қилип, йәрлик даириләрниң “шинҗаң хизмитидә қолға кәлтүргән нәтиҗилири” ни муәййәнләштүргән шундақла районда йолға қоюлуп келиватқан “үнүмлүк муқимлиқ тәдбирлиридә тәврәнмәслик” ни тәкитлигән.

Бу сөзләрни хитай мәмликәтлик сиясий мәслиһәт кеңишиниң рәиси, хитай компартийәси сиясий бюросиниң даимий әзаси, “мәркизи шинҗаң хизмәт гурупписи” ниң мәсули ваң яң 8-июндин 12-июнғичә уйғур аптоном районида хизмәт зияритидә болғанда қилған. У 5 күнлүк бу зияритидә йәрлик даириләргә хитай компартийәсиниң “шинҗаң сиясити” дики мәйданиға алақидар муһим көрсәтмиләрни бәргән.

Униң зиярити америка дөләт мәҗлиси “уйғур кишилик һоқуқ сиясити қанун лайиһәси” ни мутләқ көп аваз билән мақуллап, президентниң имза қоюшиға сунған шундақла америка дөләт мәҗлисидики “җумһурийәтчиләр тәтқиқат комитети” доклат тәйярлап, хитайниң “шинҗаң” вә хоңкоң ишлириға мәсул ваң яң, хән җең қатарлиқ сиясий бюрониң даимий әзалирини уларниң уйғур районида кишилик һоқуқни дәпсәндә қилиш, хоңкоңда демократиәигә бузғунчгилиқ қилишта ойниған роли сәвәблик қаттиқ җазалашни тәләп қилған мәзгилдә елип берилған иди.

“тәңри тағ” ториниң 15-июн хәвәр қилишичә, уйғур аптоном районлуқ партком йеқинда даимий комитетиниң кеңәйтилгән йиғинини чақирип, ваң яңниң 7 нуқтилиқ көрсәтмисини музакирә қилған. Хәвәрдә ашкарилишичә, ваң яң районда мәркәзниң “шинҗаңни идарә қилиш тоғрисидики асасий нишанида чиң туруш, үнүмлүк муқимлиқ тәдбирләрдә тәврәнмәслик, җуңхуа миллити ортақ тонушини давамлиқ илгири сүрүш, биңтуәнниң тәрәққиятини актип қоллаш, кархана тәрәққиятини тутқа қилған ишқа орунлаштурушни алаһидә чиң тутуш, шинҗаңдики ислам динини хитайлаштурушниң асасини бәрпа қилиш” қатарлиқларни тәкитлигән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.