Wang yang Uyghur rayoni ziyaritide “Muqimliq tedbirliride tewrenmeslik” ni tekitligen

Muxbirimiz erkin
2020.06.15

Xitayning “Shinjang ishliri” gha mes'ul yuqiri derijilik emeldari wang yang ötken hepte Uyghur aptonom rayonini ziyaret qilip, yerlik da'irilerning “Shinjang xizmitide qolgha keltürgen netijiliri” ni mu'eyyenleshtürgen shundaqla rayonda yolgha qoyulup kéliwatqan “Ünümlük muqimliq tedbirliride tewrenmeslik” ni tekitligen.

Bu sözlerni xitay memliketlik siyasiy meslihet kéngishining re'isi, xitay kompartiyesi siyasiy byurosining da'imiy ezasi, “Merkizi shinjang xizmet guruppisi” ning mes'uli wang yang 8-iyundin 12-iyun'ghiche Uyghur aptonom rayonida xizmet ziyaritide bolghanda qilghan. U 5 künlük bu ziyaritide yerlik da'irilerge xitay kompartiyesining “Shinjang siyasiti” diki meydanigha alaqidar muhim körsetmilerni bergen.

Uning ziyariti amérika dölet mejlisi “Uyghur kishilik hoquq siyasiti qanun layihesi” ni mutleq köp awaz bilen maqullap, prézidéntning imza qoyushigha sun'ghan shundaqla amérika dölet mejlisidiki “Jumhuriyetchiler tetqiqat komitéti” doklat teyyarlap, xitayning “Shinjang” we xongkong ishlirigha mes'ul wang yang, xen jéng qatarliq siyasiy byuroning da'imiy ezalirini ularning Uyghur rayonida kishilik hoquqni depsende qilish, xongkongda démokrati'e'ige buzghunchgiliq qilishta oynighan roli seweblik qattiq jazalashni telep qilghan mezgilde élip bérilghan idi.

“Tengri tagh” torining 15-iyun xewer qilishiche, Uyghur aptonom rayonluq partkom yéqinda da'imiy komitétining kéngeytilgen yighinini chaqirip, wang yangning 7 nuqtiliq körsetmisini muzakire qilghan. Xewerde ashkarilishiche, wang yang rayonda merkezning “Shinjangni idare qilish toghrisidiki asasiy nishanida ching turush, ünümlük muqimliq tedbirlerde tewrenmeslik, jungxu'a milliti ortaq tonushini dawamliq ilgiri sürüsh, bingtu'enning tereqqiyatini aktip qollash, karxana tereqqiyatini tutqa qilghan ishqa orunlashturushni alahide ching tutush, shinjangdiki islam dinini xitaylashturushning asasini berpa qilish” qatarliqlarni tekitligen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.