Wang yang "8-Nöwetlik memliketlik shinjanggha nishanliq yardem bérish xizmiti" yighinida "Milletlerning singishishi" ni tekitligen

Muxbirimiz irade
2021-07-22
Share

Uyghurlargha irqiy qirghinchiliq yürgüzüsh we mejburiy emgekke sélishtek jinayetler bilen eyibliniwatqan xitay hökümiti aqsuda atalmish "8-Nöwetlik memliketlik shinjanggha nishanliq yardem bérish xizmiti" yighinini achqan.

Xitayche "Tengritagh" torining xewirige qarighanda, 19-iyuldin 21-iyulghiche aqsuda échilghan bu yighinda xitay kompartiyesi siyasiy biyurosining da'imiy ezasi, "Shinjang xizmiti" ni maslashturush guruppisining bashliqi wang yang söz qilghan.

Wang yang yighindiki sözide "Shi jinpingning idiyesini, uning yéngi dewrdiki shinjangni idare qilish tedbiri" ni izchillashturushni we némiliki izchil mujimel bolup kelgen "Bash nishan" ni emeliyleshtürüshni tekitligen. Bolupmu uning chet ellerdiki közetküchiler teripidin "Uyghur medeniyitini cheklep, Uyghurlarni xitaylashturush we assimlatsiye qilish siyasiti" dep izahliniwatqan bastyurush siyasetlirini kücheytishni tekitlishi diqqet qozghidi.

Wang yang mundaq dégen: ". . . Shinjangni medeniyet arqiliq ozuqlandurushni chongqur yolgha qoyush kérek. Milletlerning alaqilishish, almashturush, singishishini ilgiri sürüshni téximu gewdilik orun'gha qoyush kérek. Shinjanggha nishanliq yardem bérish xizmitini milletler ittipaqliqi qurulushi we kishiler qelbini mujessemlesh qurulushi bilen zich birleshtürüsh kérek."

Yighinda Uyghur rayonluq partkom sékritari chén chüen'go rayonda "Ebediy eminlik turghuzush" heqqide noqtiliq toxtalghan.

Közetküchilerning qarishiche, xitay hökümiti 5-iyul ürümchi weqesidin kéyin yolgha qoyghan bu atalmish "Shinjanggha türler boyiche yardem bérish xizmet yighini" din kéyin Uyghur éli xitayning 19 ölke-shehirige bölüp bérilgen, nurghun xitay zawutliri we xitay köchmenliri köchürülüp, bügünkidek Uyghurlarning lagirgha qamilishi we mejburiy emgekke sélishining asasiy yaritilghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet