Xitay tashqi ishlar ministiri wang yi misirdiki ziyariti dawamida xitayning Uyghur élidiki siyasetlirini aqlighan

Muxbirimiz irade
2020-01-09
Élxet
Pikir
Share
Print

Xitay tashqi ishlar ministiri wang yi xitay hökümitining Uyghur élide yolgha qoyghan siyasetlirini aqlap "Xitay shinjangdiki esebiylikni yoqitish siyasetliri arqiliq yershari miqyasidiki térrorluqqa qarshi turush herikitige hesse qoshti," dégen.

U bu sözlerni 8-yanwar küni misirdiki resmiy ziyariti jeryanida misir tashqi ishlar ministiri samih shükri bilen ortaq uyushturulghan axbarat yighinida qilghan.

Shinxu'a agéntliqining xewer qilishiche, wang yi sözide Uyghur rayonidiki mesililerning "Xitayning ichki ishi" ikenlikini qattiq tekitlesh bilen birge "Shinjangdiki mesile qandaqtur kishilik hoquq we dini erkinlik mesilisi emes, u bölgünchilik we térrorluq bilen küresh qilish mesilisidur," dep körsetken.

Misirning "Bügünki misir" gézitining xewirige qarighanda, ikki dölet tashqi ishlar ministirliri uchrishishta misirning xitay bilen bolghan hersahe hemkarliqini kücheytish heqqide söhbetleshken iken. Bolupmu xewerde misirning xitay bilen iqtisadiy we siyasiy hemkarliqini kücheytish we "Bir belwagh bir yol" qurulushi boyiche hemkarlishish arzusining intayin küchlük ikenliki tekitlen'gen. "Bügünki misir" géziti bu heqtiki xewiride wang yining Uyghur élidiki lagérlarni aqlap qilghan sözlirigimu nahayiti keng orun bergen we "Xitay tashqi ishlar ministiri wang yi gherb hakimiyetlirini yalghan-yawidaq sözler arqiliq xitayning musulman dunyasi bilen bolghan munasiwitini buzmasliq heqqide agahlandurdi," dégen.

Misir hökümiti 2017‏-yili 7‏-ayning bashlirida misirda yashawatqan nechche minglighan Uyghurning tutqun qilinishi, xitaygha mejburiy qayturulushi we ghayib qilinishida xitay bilen qattiq hemkarlashqan idi. Eyni chaghdiki xewerlerde tutqun bashlinishtin burun xitay bilen misirning "Térrorluqqa qarshi turush kélishimi" imzalighanliqi we kélishim imzalinip, 3 heptidin kéyin tutqun bashlan'ghanliqi, misir hökümitining xitay saqchilirigha Uyghurlarni tutqun qilish, soraq qilish we xitaygha qayturup kétishi üchün mislisiz hoquq bergenliki ashkarilan'ghan idi.

"Bügünki misir" gézitining éytishiche, bu qétim wang yi bilen misir tashqi ishlar ministiri samih shükri arisidiki uchrishishtin kéyin, ikki terep yene "Térrorluq bilen küresh qilish we shundaqla esebiylikni yoqitish tejribilirini almashturush jehettiki hemkarliqni kücheytish" heqqide kélishken.

Toluq bet