Xitay tashqiy ishlar minstiri wang yi dunyani talibanlargha “Obyéktip” mu'amile qilishqa chaqirghan

Muxbirimiz irade
2021.08.19

Xitay tashqi ishlar ministiri wang yi dunyani talibanlargha obyéktip baha bérishke chaqirghan. U yene talibanlarning ilgirikidin “Aqilane” bolup ketkenlikini ilgiri sürgen.

Melum bolushiche, wang yi bu sözlerni en'giliye tashqiy ishlar ministiri domink ra'ab bilen télifon söhbiti qilghanda dégen. U sözide “Xelq'ara jem'iyet taliban'gha bésim qilishning ornigha uni aktip yönilishke yéteklishi kérek,” dégen. Wang yining bu sözliri bügün xelq'ara axbaratlarning zor diqqitini qozghidi.

Xitay hökümiti talibanni téxi resmiy étirap qilmighan bolsimu, biraq u taliban bilen aliqachan gheyri-resmiy uchrishishlar ötküzgen. Xitay tashqiy ishlar ministiri wang yi taliban wekillirini béyjingda kütüwélip, mexsus söhbette bolghan idi.

Xewerlerde amérika hökümiti 2021-yili apréldin bashlap afghanistandiki herbiy qisimlirini chékindürüshni bashlighandin béri xitay hökümitining yéngidin peyda bolghan bu “Siyasiy boshluq” ni toldurushqa qattiq aldiriwatqanliqi tilgha élin'ghan.

Xitay tashqi ishlar ministérliqining bayanatchisi xu'a chünyingmu 19-awghust küni qilghan sözide talibanni qollap: “Bir mesilige baha bergende, biz ilgiri yüz bergen ishlarghila emes, belki hazir yüz bériwatqan ishlarghimu qarishimiz kérek. . . Afghanistan weziyitining téz özgirishi shuni ispatlayduki, tashqiy dunyaning bir döletke bergen hökümi obyéktip we toghra emes,” dégen.

Chet'ellerdiki mutexessilerning éytishiche, xitay hökümitining taliban hökümiti bilen bolghan hemkarliqi ötken birnechche heptidin buyan barliqqa kelgen hadise emes, ular otturisidiki alaqe we hemkarliq nechche on yillap tarixqa ige. Taliban küchlirining afghanistanda hakimiyet béshigha chiqishi bu xildiki hemkarliqni téximu yuquri pellige chiqirishi tamamen mumkin iken.

Xitay hökümitining taliban bilen bolghan munasiwiti we uning Uyghurlargha körsitidighan tesiri nöwette chet'ellerdiki Uyghur közetküchilerning küchlük diqqitini qozghimaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.