Хитай ташқи ишлар министири ваң йи явропада уйғурлар вә хоңкоң мәсилиси сәвәблик тәнқидкә учриған

Мухбиримиз ирадә
2020-09-03
Елхәт
Пикир
Share
Принт

Хитай ташқи ишлар министири ваң йиниң явропа дөләтлиригә қаратқан зиярити аяғлашқан. Бирақ нурғун анализчилар ваң йиниң бу зияритидә көзлигән нәтиҗигә еришәлмигәнликини мулаһизә қилишмақта. Америкадики «вал-ситрит журнили» гезитиниң бу һәқтики хәвиридә ейтилишичә, хитай ташқи ишлар министири явропаға қаратқан зиярити арқилиқ явропа билән мунасивитини тәңшәш вә явропада америка билән бирликтә хитайға қарши сепил һасил болушиниң алдини елишни мәқсәт қилған икән. Бирақ ваң йи бу зияритидә конкрет нәтиҗә алалмиған.

Хәвәрдә ейтилишичә, ваң йи икки һәптилик бу зияритидә һәтта германийәдәк хитайға достанә бир дөләттиму гуманлиқ нәзәрләр ичидә күтүвелинған.

«Вал-ситрит журнили» гезитиниң хәвиридә мундақ дегән: «һазирға қәдәр явропа тәрәп таллаштин өзини қачуруп кәлди. Бирақ хитайниң таҗсиман вирус юқумини йошурғанлиқи вә хуавей ширкити арқилиқ ғәрбниң санлиқ мәлуматлирини йөткәп җасуслуқ қиливатқанлиқи илгири сүрүлгәндин кейин, мунасивәт җиддийлишишкә башлиди. Униң үстигә хитайниң хоңкоңдики демократийәни чәклиши, мусулман аз санлиқ милләтлиригә кәң көләмлик тутқун елип бериши вә шундақла тәйвәнәә тәһдит селиши мунасивәтләрниң совушини тезләтти.»

Хитай ташқи ишлар министири ваң йиниң зиярити бу йил америка ташқи ишлар министири икки қетим явропани зиярәт қилғандин кейин елип берилған зиярәт болуп, майк помпейо зияритидә явропани америка билән бирликтә хитайға тақабил турушқа чақирған иди.

«Вал-ситрит журнили» гезитиниң көрситишичә, тәһлилчиләр хитайни һазир явропада хитайға қарши яман көз қарашниң омумлишишиниң алдини елиш вә явропа қитәсини америка-хитай тоқунушиниң сиртида қалдуруп өзиниң иқтисадиға капаләтлик қилиш үчүн һәрикәт қиливатиду, дәп қарайдикән.

Бирақ күтүлгәнниң әксичә, италийә, фирансийә вә германийә ташқи ишлар министири қатарлиқ саһибхана ташқи ишлар министирлири хитайниң хоңкоң вә уйғур елидики сиясәтлирини вә хитайниң ташқи сияситидики муттәһәм позитсийәсини очуқ-ашкара тәнқид қилған.

Уйғурларниң мәсилисигә көңүл бөлүп келиватқан америка кеңәш палата әзаси марша бләкберин тивиттерда бу һәқтә тохтилип: «хитай ташқи ишлар министири ваң йи бейҗиңниң кеңәймичиликини илгири сүрүшни мәқсәт қилған явропадики бәш дөләт зияритини ахирлаштурди. Ваң йиниң бу сәпири явропа дөләтлириниң хитайға тақабил турмаслиқ дәвириниң ахирлашқанлиқини намаян қилди. Бу сәпәрдә чехийә, германийә, фирансийә қатарлиқ явропадики шериклиримиз хитайниң ‹хоңкоң дөләт хәвпсизлики қануни' ни вә уйғурларға қиливатқан муамилисини қаттиқ тәнқид қилди,» дәп язған.

Пикирләр (0)
Share
Толуқ бәт