Ikki Uyghur yash wélisipit bilen 6 ming kilométirliq seperge atlandi

Muxbirimiz ümidwar
2016-10-16
Share


Yéqinda ikki Uyghur wélisipit bilen jéjyang ölkisining yiwu shehiridin ürümchige bérish sepirige atlan'ghan bolup, ularning wélisipit bilen 6000 kilométirdin artuq musapini bésip ötmekchi bolushi Uyghurlar arisida küchlük qiziqish qozghighan.

“Nur tori” qatarliq Uyghur torlirida xewer qilinishiche, esli yiwu shehiride turup tijaret qiliwatqan mezkur ikki Uyghur yash 9 - ayning 21 - küni seperge atlan'ghan bolup, ular, ikki ay ichide ürümchige yétip bérishni pilan qilghan.

Ular jangshi, xubéy, xénen senshi, gensu ölkilirini bésip ötidiken, shuningdek shingshingshyadin taki qumulghiche bolghan ariliqtiki adem shalang, chöllük yollirinimu wélisipit bilen bésip ötüp, eng axirqi menzil ürümchige yétip kélidiken.

“Nur tori” qatarliq Uyghur tor betliride mezkur ikki Uyghur yigitning seper süretlirini arqimu - arqidin élan qilin'ghan bolup, melum bolushiche, ular uchisigha wélisipit tenheriketchiliri kiyidighan kiyimdin bashqa yene “Junggo” dégen xitayche chong xet bésilghan maykilarni kiygen, wélisipitlirigha xitay dölet bayriqini ésiwalghan,hetta yol üstide yene bashqa Uyghurlar bilen birlikte xitay dölet bayriqini tutup süretlerge chüshken.

Mezkur ikki Uyghurgha a'it bu xewer Uyghur diyarining ichi - sirtidiki Uyghurlarning qiziqishigha érishken bolup, bir qisim tor betlerde inkas yazghanlar ularning gheyritige apirin oqughan. Emma, chet'ellerdiki bir qisim Uyghurlar bolsa, bu ikki yigitning “Junggo” dégen xitayche xet yézilghan mayka kiyiwélishi we wélisipitlirigha xitay dölet bayraqlirini ésiwélishining özlirini qoghdash üchün ikenlikini tehlil qilishmaqta. Ismini ashkarilashni xalimighan bir közetküchining éytishiche, belki bu ikki Uyghur yash yol üstide saqchilar we ahalilarning özliridin gumanlinip,tosalghu hem awarichiliq peyda qilishidin saqlinish üchün shundaq qilghan bolushi mumkin, chünki, yéqinqi waqitlarda bezi ichkiri xitay ölkiliridiki yerlik saqchi organliri Uyghurlarni körse melum qilish, hetta ulargha yataq bermeslik qatarliq uqturushlarni chiqarghan idi.

Melum bolushiche, Uyghurlarning mundaq uzun,japaliq seperlerge tewekkul qilishi buningdin on nechche yil ilgiri Uyghur qizi gölzöhre teklimakan chölidin yügürüp ötüsh sepirige atlinish bilen bashlan'ghan bolup, u shu chaghda xelq teripidin “Teklimakan melikisi”dep teriplen'gen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet