Ғәрб көзәткүчилири: уйғур елидики вәқәләрниң сәвәби иқтисадий баравәрсизлик

Хитай даирилири уйғур елидики қаршилиқ һәрикәтлириниң һәммисини аталмиш диний ашқунларға дөңгәп келиватқан болсиму, ғәрб көзәткүчилири вәқәләрниң сәвәби райондики иқтисадий баравәрсизлик икәнликини илгири сүрди.

Ройтерста хәвәр қилишичә, уйғур елидә йәрлик уйғурлар иш тепишта кәмситилишкә учраватқан мәзгилдә, хитайниң башқа җайлиридин нәччә миң чақирим йол йүрүп бу җайға кәлгән көчмәнләр интайин тизла хизмәт тапалайдикән.

Хәвәрдә нәқил қилишичә, уйғур елигә йеңи кәлгән ши фамилилик бир хитай көчмән мундақ дегән: бу йәрдә кирим яхши болғачқа шунчә йол йүрүп кәлдуқ. Уйғурларниң нопуси аз, улар бу йәрдики ишларниң һәммисини қилип түгитәлмәйду.

Һалбуки, йәрлик уйғурлар уйғур елидә иш пурсәтлириниң интайин азлиқиға қаримай, бу йәрдики хизмәтләрниң хитай аққунларға берилидиғанлиқини билдүрүшкән.

Ели исимлик бир уйғур яш мундақ дегән: бу йәрдә сирттин кәлгәнләр интайин көп, улар иш издәп кәлгән. Әмма иш орни унчә җиқ әмәс.

Хәвәрдә көрситишичә, хоңкоң пән-техника университетидики профессор барй саутман: хизмәт тепишқа кәлсәк, сәвийиси юқири уйғурларму қаттиқ чәклимиләргә учрайду, йәнила көплигән хизмәт орунлири хитайлар билән толдурулиду, дегән.

Өткән йили уйғур елидә көрүлгән қаршилиқ вәқәлиридә 100 дин артуқ адәм өлтүрүлгән.

Униңдин башқа бу йил киргәндин буян, күнмиң вогзали һуҗуми вә үрүмчи вогзали адәмбомба һуҗуми йүз берип, илгири-кейин болуп 30 нәччә адәм өлгән, 100 дин артуқ адәм яриланған.

Хитай даирилири вәқәни уйғур диний ашқунлар садир қилғанлиқини хәвәр қилған иди.