Марко рубийо: “хамаспәрәс тик-ток видийолири хитайниң учур урушиниң кеңийишидур! ”

Вашингтондин мухбиримиз әзиз тәйярлиди
2023.11.23

Йеқиндин буян оттура шәрқ районидики “хамас” ниң қораллиқ һуҗумлирини чөридигән һалда юқири пәллигә чиқиватқан ахбарат долқунлири пүтүн дуняниң диққитини қозғаватқан болуп, һалбуки бу йәрдә диққәттин чәттә қеливатқан бир мәсилә америка кеңәш палатасиниң әзаси марко рубийониң “вашингтон тәптиши” гезитидә йеқинда елан қилинған бу һәқтики мәхсус обзорида алаһидә тәкитләнди.

Марко рубийониң обзорида ейтилишичә, вәтәнпәрвәрлик әзәлдин америка қошма шитатлиридики һәммигә тонушлуқ вә ортақ болған чүшәнчә болуп, нөвәттә бу тонуш унтулушқа йүзләнгән. Бу хил йүзлинишкә һазир сүкүт қилиниватқан болсиму, америка қошма шитатлириға өчмәнлик қиливатқан һәмдә қирғинчилиқни тәшәббус қилидиған бир дөләтниң сифирлиқ һуҗумлириға америка хәлқиниң давамлиқ сәври қилишиға болмайду. Нөвәттә буниң бир типик ипадиси хитай һөкүмити контрол қиливатқан “тик-ток” та хамаспәрәслик вә исраилийәгә қарши туруш мәзмунидики мәзмунларниң төкмә болуши һәмдә шу арқилиқ җамаәт пикрини хитай һөкүмитиниң мәвқәсигә әгишишкә йүзләндүрүш болуватқанлиқи мәлум.

Обзорда ейтилишичә, пурсәт кәлгән туруқлуқму “тик-ток” ниң мәни қилинмаслиқи америка һөкүмити садир қилған әң чоң хаталиқларниң бири һесаблиниду. Марксизмниң тәшәббусчиси болған “тик-ток” һазир җамаәт пикрини хитай компартийәсигә майил қилишта солчилардинму артуқ хизмәт қилмақта. Дәл шундақ болғанлиқи үчүн хитай һөкүмити дөләтниң ички қисмида “тик-ток” ни мәни қилип, униң хитайчә вариянти болған “дуйин” ни омумлаштурған һәмдә буниңдин пайдилинип өзигә пайдилиқ җамаәт пикри шәкилләндүрүшкә урунған. Әмма “тик-ток” та болса һә десә “хамас” ни мәдһийәләш, террорлуқни һимайә қилиш, ашқунлуқ, җинайәткә мәптун болуш вә җәмийәткә қарши чиқиш мәзмунидики мәзмунларға орун аҗритип кәлгән.

Марко рубию мушу әһвалларни омумлаштуруп, “һазир биз көрүватқан ‛тик-ток‚ та ‛хамас‚ ни һимайә қилиш мәзмунидики қисқа видийолар ямрап кетиватиду. Әмәлийәттә буларниң һәммиси америкини биринчи номурлуқ дүшмән дәп қарайдиған хитай компартийәсиниң хизмәт йөнилиши билән мас қәдәмдә оттуриға чиқиватиду. Техиму муһими шуки, булар пәқәт хитай һөкүмити оттуриға чиқириватқан ғайәт зор көләмлик ‛рәқәмлик тәсир көрситиш уруши‚ ниң кичиккинә бир картиниси, халас” дәйду.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.