Marko rubiyo: “Xamasperes tik-tok widiyoliri xitayning uchur urushining kéngiyishidur! ”

Washin'gtondin muxbirimiz eziz teyyarlidi
2023.11.23

Yéqindin buyan ottura sherq rayonidiki “Xamas” ning qoralliq hujumlirini chöridigen halda yuqiri pellige chiqiwatqan axbarat dolqunliri pütün dunyaning diqqitini qozghawatqan bolup, halbuki bu yerde diqqettin chette qéliwatqan bir mesile amérika kéngesh palatasining ezasi marko rubiyoning “Washin'gton teptishi” gézitide yéqinda élan qilin'ghan bu heqtiki mexsus obzorida alahide tekitlendi.

Marko rubiyoning obzorida éytilishiche, wetenperwerlik ezeldin amérika qoshma shitatliridiki hemmige tonushluq we ortaq bolghan chüshenche bolup, nöwette bu tonush untulushqa yüzlen'gen. Bu xil yüzlinishke hazir süküt qiliniwatqan bolsimu, amérika qoshma shitatlirigha öchmenlik qiliwatqan hemde qirghinchiliqni teshebbus qilidighan bir döletning sifirliq hujumlirigha amérika xelqining dawamliq sewri qilishigha bolmaydu. Nöwette buning bir tipik ipadisi xitay hökümiti kontrol qiliwatqan “Tik-tok” ta xamaspereslik we isra'iliyege qarshi turush mezmunidiki mezmunlarning tökme bolushi hemde shu arqiliq jama'et pikrini xitay hökümitining mewqesige egishishke yüzlendürüsh boluwatqanliqi melum.

Obzorda éytilishiche, purset kelgen turuqluqmu “Tik-tok” ning men'i qilinmasliqi amérika hökümiti sadir qilghan eng chong xataliqlarning biri hésablinidu. Marksizmning teshebbuschisi bolghan “Tik-tok” hazir jama'et pikrini xitay kompartiyesige mayil qilishta solchilardinmu artuq xizmet qilmaqta. Del shundaq bolghanliqi üchün xitay hökümiti döletning ichki qismida “Tik-tok” ni men'i qilip, uning xitayche wariyanti bolghan “Duyin” ni omumlashturghan hemde buningdin paydilinip özige paydiliq jama'et pikri shekillendürüshke urun'ghan. Emma “Tik-tok” ta bolsa he dése “Xamas” ni medhiyelesh, térrorluqni himaye qilish, ashqunluq, jinayetke meptun bolush we jem'iyetke qarshi chiqish mezmunidiki mezmunlargha orun ajritip kelgen.

Marko rubiyu mushu ehwallarni omumlashturup, “Hazir biz körüwatqan ‛tik-tok‚ ta ‛xamas‚ ni himaye qilish mezmunidiki qisqa widiyolar yamrap kétiwatidu. Emeliyette bularning hemmisi amérikini birinchi nomurluq düshmen dep qaraydighan xitay kompartiyesining xizmet yönilishi bilen mas qedemde otturigha chiqiwatidu. Téximu muhimi shuki, bular peqet xitay hökümiti otturigha chiqiriwatqan ghayet zor kölemlik ‛reqemlik tesir körsitish urushi‚ ning kichikkine bir kartinisi, xalas” deydu.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.