Хитай баш әлчиси харвард университетида нутуқ сөзләватқанда намайишчи оқуғучиларниң қаттиқ әйиблишигә учриған

Вашингтондин мухбиримиз уйғар тәйярлиди
2024.04.22

20-Апрел күни хитайниң америкада турушлуқ баш әлчиси шйе фең харвард университетида нутуқ сөзләватқанда, мәзкур университетта оқуватқан тәйвәнлик вә тибәт оқуғучилар юқири авазда товлап, хитайниң шәрқий түркистан, тибәт вә хоңкоңда йүргүзүватқан кишилик һоқуқ дәпсәндичиликлирини қаттиқ әйиблигән.

 “харвард киримсон” (The Harvard Crimson) гезитиниң мәхсус хәвиригә қариғанда, шу күнидики бу күтүлмигән вәқә хитай баш әлчисиниң нутуқ сөзләш паалийитини қалаймиқанлаштуруп, уни осал әһвалда қойған, шундақла йиғин залидики аңлиғучилар арисида ғулғула көтүрүлгән.

Мәзкур хәвәрдә мундақ дейилгән: “йиғин мәйданида наразилиқ билдүргән оқуғучилар, хитайниң америкада турушлуқ баш әлчиси шйе феңни хитайниң тибәт вә шәрқий түркистандики ирқий қирғинчилиқиға янтаяқ болуш, хоңкоңниң демократийәсини йоқитиш вә тәйвәнгә таҗавуз қилишни тәшәббус қилиш билән әйиблигән, шундақла бу җинайәтләрдә униң шериклики бар дәп варқириған”.

 “хитай компартийәсигә қарши оқуғучилар һәмкарлиқи” тәшкилатиниң әзалиридин бири болған косете т ву (Cosette T. Wu) Хитай баш әлчиси шйе феңниң сөзини бөлгән болуп, у “харвард киримсон” гезитигә мундақ дегән: “хитайниң америкада турушлуқ баш әлчиси шйе феңниң харвард университетиға тәклип қилип нутуқ сөзлитиш вә униң сәпсәтәлиригә сорун һазирлап бериш, бизниң қиммәт қаришимизға, шундақла харвард университетиниң қиммәт қарашлириға зит һәрикәттур. Харвард университети бундақ ишларға һәргиз сорун һазирлап бәрмәслики керәк. Биз ирқий қирғинчилиқ йүргүзүватқан бир мустәбит һөкүмәткә вәкиллик қилидиған, кишилик һоқуқни дәпсәндә қилиш қилмишиға һәмкарлашқан бир кишигә һәргизму орун бәрмәймиз”.

Харвард университетидики бу қетимлиқ наразилиқ намайишини әркин тибәт оқуғучилар уюшмиси билән хитай компартийәсигә қарши оқуғучилар һәмкарлиқи тәшкилати бирликтә уюштурған болуп, тәхминән 35 оқуғучи қатнашқан. Бу намайишқа харвард университетиниң оқуғучилиридин башқа йәнә бостонниң йәрлик аһалилириму қатнашқан. Наразилиқ намайиши сәвәбидин хитай баш әлчиси шйе феңниң нутуқи 35 минут кечиктүрүлүп башланған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.