Türkiyediki “Ayyultuz” xakkirliri xitaygha hujum qildi

Türkiyening ayyultuz nami bilen tonulghan xakkir guruppisi 30-iyun küni féysbok, twitér qatarliq ijtima'iy alaqe torlirigha uchur yollap, xitaygha a'it köpligen hökümet tor betliri we bir qisim qurulush shirketlirining tor betlirige hujum qilghanliqi bildürdi.

Ayyultuz nami bilen tonulghan xakkir guruppisining élan qilishiche, mezkur xakkir guruppisi teripidin hujumgha uchrighan tor betlerde, “Biz sherqiy türkistanliq qérindashlirimizning yénida” dégen sözler yézilghan. Ular hujum qilghan tor betlerge ong teripige sherqiy türkistanning ay yultuzluq kök bayriqi, sol teripige türkiyening bayriqi, otturigha guruppining belgisi chüshürülgen resimni chaplighan we bu resimlerning otturisigha “Bir allahdin bashqa ilah yoq, muhemmed eleyhissalam allaning elchisi” dégen shahadet kelimisi bilen, “Allaning dergahida qobul bolghan din islam dinidur” dégen ayetni yazghan.

Melum bolushiche, mezkur xakkir guruppisi xitayning hökümet we qurulush, soda töriliridin 128 tor betke hujum qilghanliqini élan qilip bu tor béketlirining adréslirini ashkara élan qilghan. Ayyultuz xakkir guruppisi ijtima'iy alaqe torlirigha yollighan uchurida bu qétimqi tor hujumining meqsiti heqqide toxtilip, “Sherqiy türkistanda zulumgha uchrighan Uyghur türkler üchün heriketke ötken” likini bildürgen. Xitay tor biketlirige “Bizge qilich urmighuche, dinimizgha haqaret qilmighuche, wetinimizge bésip kirmighuche, millitimizge zulum qilmighuche bizdin héch kishige ziyan kelmeydu”, “Élip barghan zulumliringgha süküt qilmaymiz, türkistan yalghuz emes, heddingdin ashma, biz zulum bolghan hemme yerde bar, heddingdin ashma, irqchiliq axirilashmighuche silerge rahet yoq, türkning sebrini tashurma” dégen sözler yézilghanliqini bildürgen.