Чуңчиңда өзлирини хәлқ вәкилликигә намзат көрсәтмәкчи болған икки киши солап қоюлған

Радийомиз хитайчә бөлүминиң хәвәр қилишичә, хитайниң чуңчиң шәһиридә өзлирини хәлқ вәкили намзатлиқиға тизимлитиш алдида турған икки киши сақчилар тәрипидин сәвәбсиз тутуп әкитилип пурсәт өткичә солап қоюлған.

Мәлум болушичә, чуңчиңдики йүҗуң районида хәлқ вәкилликигә намзатлиққа тизимлитиш 18-ноябир башланған вә 22-ноябир чүштин кейин саәт 5 тә ахирлашқан. Мәзкур тәвәликтә өзлирини мустәқил намзатлиққа көрсәтмәкчи болған хән ляң вә ший дән исимлик икки киши, бири сақчилар тәрипидин, йәнә бири намәлум кишиләр тәрипидин бағлап әкитилип 3 күнгичә чәт бир җайдики намәлум орунға солап қоюлған вә намзат тизимлаш вақти ахирлашқанда қоюп берилгән.

Мәзкур икки шәхсниң радийомизға ашкарилишичә, улар бүгүн чуңчиң шәһәрлик хәлқ қурултийиға берип әһвални мәлум қилған вә өзлирини бу пурсәттин мәһрум қалдурған сақчи вә намәлум кишиләр үстидин тәкшүрүш елип беришни тәләп қилған. Хәвәрләрдә баян қилинишичә, бу хил әһваллар мушу бир һәптә ичидә хитайниң бейҗиң вә шаңхәй қатарлиқ җайлиридиму йүз бәргән. Даириләр сайламда идарә-органлар тәрипидин тәйинләнгән намзатларни тизимлап, мустәқил намзатларниң өзини тизимлитишини һәр хил усулда чәклигән.

Хитай асасий қанунида 18 яшқа тошқан һәрқандақ пуқраниң сайлаш-сайлиниш һоқуқи барлиқи дөләт қурулғандила бәлгиләнгән болсиму, даириләрниң әң төвән қатламдики мустәқил намзатлардинму чөчүши көзәткүчиләрниң диққитини тартмақта.