Хәлқара қәләмкәшләр җәмийити хитай журналист гав йүни қоюп беришкә чақирди

Хәлқара қәләмкәшләр җәмийити баянат елан қилип, хитай даирилирини түрмидики атақлиқ хитай журналист гав йүгә артилған җинайәтни бикар қилишқа вә уни қоюп беришкә чақирди.

Қәләмкәшләр җәмийити баянатида, гав йүниң саламәтлик әһвалидин қаттиқ әндишә қиливатқанлиқини тәкитләп, “даириләр униң зөрүр тәбиий асраш вә давалашқа еришишигә капаләтлик қилиши керәк” деди.

Гав йү өткән йили 4‏-айда қолға елинған. У бу йил 4‏-айда бейҗиң шәһәрлик 3‏-оттура сот мәһкимиси тәрипидин “дөләт мәхпийәтликини ашкарилаш җинайити”билән әйиблинип, 7 йиллиқ қамаққа һөкүм қилинған иди. Лекин гав йүниң адвокатиниң йеқинда ахбарат васитилиригә ашкарилишичә, униң түрмидә йүрәк кесили қозғилип, саламәтлик әһвали начарлишип кәткән. У адвокатиға “мән түрмидә өлүшни халимаймән” дегән.

Хитай һөкүмити гав йүни компартийәниң 9‏-номурлуқ һөҗҗитини чәтәл ахбаратиға ашкарилаш билән әйиблигән. Компартийәниң 2013‏-йили тарқитилған 9‏-номурлуқ һөҗҗитидә, униң идеологийилик күрәш пилани оттуриға қоюлған.

Униңда, асаси қанунлуқ демократийә тәләплиригә қандақ қарши туруш, ахбарат әркинлики, әдлийә мустәқиллиқи, кишилик һоқуқ муназирилирини қандақ мәни қилиш һәққидә көрсәтмиләр берилгән.