Xelq'ara qelemkeshler jem'iyiti xitay zhurnalist gaw yüni qoyup bérishke chaqirdi

Xelq'ara qelemkeshler jem'iyiti bayanat élan qilip, xitay da'irilirini türmidiki ataqliq xitay zhurnalist gaw yüge artilghan jinayetni bikar qilishqa we uni qoyup bérishke chaqirdi.

Qelemkeshler jem'iyiti bayanatida, gaw yüning salametlik ehwalidin qattiq endishe qiliwatqanliqini tekitlep, “Da'iriler uning zörür tebi'iy asrash we dawalashqa érishishige kapaletlik qilishi kérek” dédi.

Gaw yü ötken yili 4‏-ayda qolgha élin'ghan. U bu yil 4‏-ayda béyjing sheherlik 3‏-ottura sot mehkimisi teripidin “Dölet mexpiyetlikini ashkarilash jinayiti”bilen eyiblinip, 7 yilliq qamaqqa höküm qilin'ghan idi. Lékin gaw yüning adwokatining yéqinda axbarat wasitilirige ashkarilishiche, uning türmide yürek késili qozghilip, salametlik ehwali nacharliship ketken. U adwokatigha “Men türmide ölüshni xalimaymen” dégen.

Xitay hökümiti gaw yüni kompartiyening 9‏-nomurluq höjjitini chet'el axbaratigha ashkarilash bilen eyibligen. Kompartiyening 2013‏-yili tarqitilghan 9‏-nomurluq höjjitide, uning idé'ologiyilik küresh pilani otturigha qoyulghan.

Uningda, asasi qanunluq démokratiye teleplirige qandaq qarshi turush, axbarat erkinliki, edliye musteqilliqi, kishilik hoquq munazirilirini qandaq men'i qilish heqqide körsetmiler bérilgen.