Америка кеңәш палата әзалири хитайниң хәлқара сақчини суйиистемал қилиши һәққидә мәлумат тәләп қилди

Мухбиримиз әзиз
2018-04-30
Елхәт
Пикир
Share
Принт

26-Апрел күни америка кеңәш палата әзалиридин марко рубийо вә патрик ләхий қатарлиқлар америка қошма штатлири әдлийә министирлиқиниң баш адвокати җеф сешшинсқа мәктуп йоллиди.

Мәктупта улар хитай даирилириниң хәлқара сақчи тәшкилати (интерпол) ниң қизил рәңлик тутуш буйруқини суйиистемал қилиш арқилиқ чәтәлдики өктичиләрни паракәндә қиливатқанлиқи һәмдә уларниң хитай тәвәсидики уруқ-туғқанлириға тәһдит селиш арқилиқ бу өктичиләрни хитайға қайтип беришқа мәҗбурлаватқанлиқи һәққидә чүшәнчә беришни тәләп қилған.

Мәзкур мәктупниң толуқ текисти марко рубйо вә патрик ләхийниң авам палата торидики бәтлиридә елан қилинған. Униңда хитай һөкүмитиниң өткән бирнәччә йилда хәлқара сақчи тәшкилатиниң қизил рәңлик тутуш буйруқини халиғанчә суйиистемал қилип, уни өзиниң хусусий мәнпәәти үчүн хизмәт қилдурғанлиқи алаһидә тәкитләнгән. Шуниң билән биргә әгәр бундақ қилмишқа давамлиқ йол қоюлса униң һәқиқий мәнидики «қизил рәңлик тутуш буйруқи» ниң иҗра болушиға яман тәсири болидиғанлиқи көрситилгән.

Мәктупта йәнә хәлқара сақчи тәшкилатиниң рәиси болуп ишләватқан мең хоңвейниң хитай җамаәт хәвпсизлики министирлиқиниң муавин министири болуш салаһийити билән бу хил суйиистемал қилмишида өз мәҗбурийитини халис ада қилған яки қилалмиғанлиқи һәққидиму көплигән гуманлиқ мәсилиләрниң барлиқи тилға елиниду.

Мәлум болушичә, хитай һөкүмитиниң сахта мәлуматлар билән тәминлиши сәвәблик уйғур паалийәтчиләрдин долқун әйсаға чиқирилған «қизил рәңлик тутуш буйруқи» 21 йил мәвҗут болған иди. 2017-Йили март ейида долқун әйса үстидики бу хата буйруқ бикар қилинған һәмдә «уйғур давасиниң хәлқарадики бир чоң ғәлибиси,» дәп аталған иди.

Пикирләр (0)
Share
Толуқ бәт