Amérika kéngesh palata ezaliri xitayning xelq'ara saqchini suyi'istémal qilishi heqqide melumat telep qildi

Muxbirimiz eziz
2018-04-30
Share

26-Aprél küni amérika kéngesh palata ezaliridin marko rubiyo we patrik lexiy qatarliqlar amérika qoshma shtatliri edliye ministirliqining bash adwokati jéf séshshinsqa mektup yollidi.

Mektupta ular xitay da'irilirining xelq'ara saqchi teshkilati (intérpol) ning qizil renglik tutush buyruqini suyi'istémal qilish arqiliq chet'eldiki öktichilerni parakende qiliwatqanliqi hemde ularning xitay tewesidiki uruq-tughqanlirigha tehdit sélish arqiliq bu öktichilerni xitaygha qaytip bérishqa mejburlawatqanliqi heqqide chüshenche bérishni telep qilghan.

Mezkur mektupning toluq tékisti marko rubyo we patrik lexiyning awam palata toridiki betliride élan qilin'ghan. Uningda xitay hökümitining ötken birnechche yilda xelq'ara saqchi teshkilatining qizil renglik tutush buyruqini xalighanche suyi'istémal qilip, uni özining xususiy menpe'eti üchün xizmet qildurghanliqi alahide tekitlen'gen. Shuning bilen birge eger bundaq qilmishqa dawamliq yol qoyulsa uning heqiqiy menidiki "Qizil renglik tutush buyruqi" ning ijra bolushigha yaman tesiri bolidighanliqi körsitilgen.

Mektupta yene xelq'ara saqchi teshkilatining re'isi bolup ishlewatqan méng xongwéyning xitay jama'et xewpsizliki ministirliqining mu'awin ministiri bolush salahiyiti bilen bu xil suyi'istémal qilmishida öz mejburiyitini xalis ada qilghan yaki qilalmighanliqi heqqidimu köpligen gumanliq mesililerning barliqi tilgha élinidu.

Melum bolushiche, xitay hökümitining saxta melumatlar bilen teminlishi seweblik Uyghur pa'aliyetchilerdin dolqun eysagha chiqirilghan "Qizil renglik tutush buyruqi" 21 yil mewjut bolghan idi. 2017-Yili mart éyida dolqun eysa üstidiki bu xata buyruq bikar qilin'ghan hemde "Uyghur dawasining xelq'aradiki bir chong ghelibisi," dep atalghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet