Uyghur diyaridiki zulumning layihiligüchiliri xelq'araliq diqqet qozghidi

Muxbirimiz eziz
2021-10-19
Share

Awstraliye istratégiyelik siyaset instituti teyyarlap chiqqan "Zulum binakarliqi" serlewhilik zor hejimlik doklat 19-öktebir küni élan qilin'ghandin kéyin Uyghur diyaridiki irqiy qirghinchiliqning bash layiheligüchiliri we ijrachiliri mesilisi yene bir qétim xelq'araning zor diqqitini qozghidi.

Doklatta körsitilishiche, Uyghur diyaridiki siyasiy basturush herikiti deslepki zor tutqundin taki yéqinqi qirghinchiliq basquchigha qeder oxshimighan jeryanni bashtin kechürgen bolup, bularning hemmiside bir shexsning yaki melum idare-jem'iyetning xas mes'uliyiti mewjut emes iken. Eksiche bu partiye, hökümet we qanun sistémisini öz ichige alghan pütkül hökümranliq méxanizmi zich hemkarlashqan bir qétimliq kolléktip qurulush bolup, yuqirida shi jinping, töwende chén chüen'go qatarliq bir türküm yuqiri derijilik kompartiye rehberliri buninggha qomandanliq qilghan. Pütkül partiye we hökümet sistémisi buninggha toluq ishtirak qilghan. Shunga bu menidin alghanda xitay hökümitining aghzidin chiqqan "Bizde muqimliq mesilisini özining muhim xizmet wezipisi qilmighan birmu idare-jem'iyet mewjut emes" dégen sözni pütünley ré'alliq asasidiki heqiqiy teswir déyishke bolidiken.

Awstraliye istratégiyelik siyaset institutining mezkur doklatida alahide orun igiligen bir ehwal Uyghur diyaridiki qirghinchiliqqa biwasite ishtirak qilghan hökümet emeldarliridin ikki kishining buningdin ilgiri amérikidiki xarward uniwérsitétida ziyaretchi alim süpitide bilim ashurghanliqi hésablinidu. Bularning biri hazirqi Uyghur aptonom rayonluq hökümetning muweqqet re'isi erkin tuniyaz bolup, u 2012-yili xarward uniwérsitétida qisqa muddet bilim ashurghaniken. 2021-Yilining béshida u jenwediki b d t binasida söz qilghan hemde Uyghur diyaridiki lagér sistémisini aqlap "Terbiyelesh merkezliri térrorluq we ashqunluqni tügitishtiki zörür tedbirler" dégen.

Yene bir kishi maralbéshi nahiyelik partkomning sékrétari, bu yil 36 yashqa kirgen yaw ning iken. Yaw ning eyni waqitta xitaydiki chingxu'a uniwérsitétida doktorluqta oquwatqan bolup, 2011-yili xarward uniwérsitétigha üch ayliq bilim ashurushqa kelgen. 2014-Yili oqushni püttürgen yaw ning qeshqer yéngisheherde, kéyin maralbéshi nahiyeside memuri xizmet bilen shughullan'ghan. 2019-Yili maralbéshi nahiyelik partkomning sékrétari bolghan. U sékrétarliqqa teyinlen'gen maralbéshi nahiyeside tutup turush ornidin toqquzi bar bolup, u xizmetke chüshkendin kéyin nahiyelik hökümet yéngidin 320 neper saqchi qobul qilghan. 2021-Yili iyulda xitay re'isi shi jinping 103 neper ilghar xizmetchini qobul qilghanda yaw ningmu shularning qataridin orun alghan hemde uninggha "Munewwer nahiye sékrétari" dégen nam bérilgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet