Xelq'arada Uyghurlar üchün emeliy heriketke ötüsh chaqiriqliri kücheydi

Birleshken döletler teshkilati kishilik hoquq aliy komissari mishél bachélit ishxanisi uzundin buyan kütülgen doklatni élan qilip “Xitay hökümitining Uyghur we bashqa musulmanlargha yürgüzüwatqan wehshiyliklirining insaniyetke qarshi jinayet shekillendürüshi mumkin” dep yekün chiqarghandin kéyin xelq'arada heriketke ötüsh chaqiriqliri kücheydi.

Nurghun xelq'araliq kishilik hoquq organliri chaqiriqlirida birleshken döletler teshkilatini shundaqla amérika qatarliq gherb démokratik döletlirini emeliy heriketke ötüshke dewet qildi.

Amérikadiki kommunizmning ziyankeshlikige uchrighuchilarni xatirilesh fondi (Victims Of Communism Memorial Foundation), kishilik hoquqni közitish teshkilati we xelq'ara kechürüm teshkilati, erkinlik sariyi qatarliq organlar tiwittérda élan qilghan bayanatlirida birleshken döletler teshkilatining we erkin démokratik dunyaning emdi heriketke ötüshi, rayon'gha musteqil tekshürgüchilerni ewetishi, xitay hökümitini jazalishi kéreklikini bildürüshken.

Doklat élan qilin'ghandin kéyin 20 dölette turushluq 60 Uyghur teshkilati birlikte ortaq bayanat élan qilip xelq'ara jem'iyetni jümlidin herqaysi hökümetler, köp tereplik organlar we xelq'araliq shirketlerni heriketke ötüshke chaqirghan. Dunya Uyghur qurultiyi tor bétide élan qilin'ghan bu chaqiriqta munular déyilgen:

“B d t ning bu doklati intayin muhim. U eza döletler, b d t organliri we dunya soda sahesining emeliy we ünümlük heriket qilishigha yol achidu”.

Dunya Uyghur qurultay re'isi dolqun eysa bolsa bayanattiki sözide “Jawabkarliqqa tartish emdi bashlinishi lazim” dégen.

Amérikadiki nopuzluq kishilik hoquq orgini “Erkinlik sariyi” bolsa tiwittérda élan qilghan chaqiriqida b d t kishilik hoquq aliy komissariyatining axiri Uyghurlargha qiliniwatqan zulumni békitkenlikini qarshi alghan we mundaq dep tekitligen: “Erkinlik sariyi intayin éniq bu pakitlarning irqiy qirghinchiliq we insaniyetke qarshi turush jinayiti teshkil qilidighanliqigha ishinidu. Herqaysi hökümetler bu jinayetlerni sadir qiliwatqan we uningdin nepke érishkenlerni jawabkarliqqa tartish üchün mas qedemde tirishchanliq körsitip, Uyghur rayonida ishlepchiqirilghan mehsulatlargha qaratmiliqi bolghan jazalash we cheklesh tedbirlirini élishi kérek”.