Йеңи зеландийә ташқи ишлар министири хитайниң тинч окян райониға сиңип киришидин һошяр турушни тәкитлиди

Мухбиримиз әркин
2018-03-02
Share

Йеңи зеландийәниң муавин баш министири, қошумчә ташқи ишлар министири венстон петерс, тинч окян районидики дөләтләрни хитайниң бу районға сиңип киришидин һошяр болушқа чақирған. Униң көрситишичә, йеңи зеландийә билән австралийә җәнубий тинч окяндики дөләтләрниң ишлириға арилишиши вә уларға ярдәм беришни күчәйтип, хитайниң бу районға сиңип киришигә тақабил туруши керәк икән.

Венстон петерс бу сөзләрни йеңи зеландийәниң баш министири җасенда ардерн җүмә күни седнийда австралийә баш министири тюренбул билән көрүшүштин бир күн аввал қилған. Петерс пәйшәнбә күни австралийәдики ловий тәтқиқат институтида нутуқ сөзлигән болуп, у: "пүткүл тинч окян райони истратегийәлик риқабәт мәйданиға айлинип қалмақта. Бу тинч окяндики аралларниң рәһбәрлиригә техиму көп таллаш пурсити бәрсиму, әмма у мәлум дәриҗидә истратегийәлик әндишиләрни пәйда қилмақта," дегән.

Австралийә билән йеңи зеландийә бурун җәнубий тинч окяндики арал дөләтлириниң ишлирида һалқилиқ рол ойнап кәлгән. Әмма йеқинқи йилларда хитайниң бу районға сиңип кириши уларниң тәсиригә күчлүк хирис пәйда қилған. Австралийә ловий институтиниң статистика қилишичә, хитай йеқинқи 10 йил ичидә җәнубий тинч окяндики арал дөләтлиригә бир милярд 800 милйон доллар мәбләғ салған.

Һалбуки, бу йил 1‏-айда австралийәниң хәлқара тәрәққият вә тинч окян ишлири министири консета фераванти велс, бейҗиңниң бу аралларға "керәксиз бина" вә "ахири йоқ йоллар" ни ясап берип, уларни қәрзгә боғуп қойғанлиқини билдүргән. Униң сөзи хитай даирилириниң қаттиқ наразилиқини қозғиған иди. Венстон петерс ловий институтида қилған сөзидә йәнә йеңи зеландийәниң җәнубий тинч окян дөләтлиригә беридиған ярдимини көпәйтидиғанлиқи, бу арқилиқ йеңи зеландийәниң мәзкур дөләтләрдики тәсирини сақлап қелишқа тиришидиғанлиқини билдүргән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт