Хитайниң дуняни “оңда қоюш” бәдилигә пайда алмақчи болуши тәнқидләнди

Америка билән хитай оттурисидики сода уруши рәсмий башланғандин буян бу һәқтики мулаһизиләр һәрқайси мәтбуатларда көпләп йәр алмақта.

Әмма америка президенти доналд трампниң сода ишлиридики баш мәслиһәтчиси питер наварро 19-июл күни CNBC телевизийә қанилида елан қилинған бу һәқтики муһакимидә сөз қилип: “хитай нөвәттә пүткүл дуняни оңда қоюп, дуняниң қолдин берип қойғини һесабиға өзини сәмритмәктә. Биз өз мәнпәәтимизни қоғдимисақ болмайдиған басқучқа өттуқ” дегән.

Наваррониң пикричә, америка нөвәттә өзиниң тәқлидий әқил вә башқа юқири пән-техника саһәсидики мувәппәқийәтлирини қоғдиши, хитайниң бу “лоқ гөш” ләрни бикарниң орнида йәвелишидин сақлиниш чарилирини тепип чиқиши лазим икән. Йәнә келип, хитай һазир пүткүл дуняни зиянға учритиш һесабиға зораймақта икән.

Наварро нуқтилиқ қилип хитайниң әқлий мүлүк оғрилиқ қилмишиниң ялғуз америкинила әмәс, пүткүл дуняни зиянға учритиватқанлиқини, буниң билән әқлий мүлүк вә техника байлиқиниң оғрилиниватқанлиқини алаһидә тәкитлигән һәмдә: “хитай әмдиликтә бизниң таҗимиздики мәрвайитқа қол узитиватиду” дегән.

Мәлум болушичә, алақидар затлар хитайниң һелиһәм хәлқара барар вә сода мизанлириға әмәл қилиш нийитиниң йоқлуқини көрсәткән болуп, америка һөкүмитини бу һәқтә тәхир қилмаслиққа үндәш садалири күчәймәктә икән.