Урсула вон дер лейен хитайдики мәзгилидә уйғурлар һәққидә сөзләшкә чақирилди

Мухбиримиз ирадә
2023.03.30

Явропа комиссийониниң рәиси урсула вон дер лейен хитай йүргүзүвтқан дипломатийәгә қарши явропаниң чоқум дипломатик вә иқтисадий җәһәттин хәтәрдин сақлинишниң йоллирини издиши керәкликини билдүргән.

У хитайниң силаһат дәвридин һалқип, қамал дәвригә қәдәм қойғанлиқини әскәртип туруп: “хитайниң иқтисадий көлими вә йәршариниң тәсирини көздә тутқанда, явропа бирләшмисиниң бу мунасивәтни тоғра идарә қилиши явропа иттипақиниң иқтисадиниң гүллиниши вә бихәтәрликини бәлгиләйдиған амил болуп қалиду” дегән.

У сөзидә йәнә: “хитайниң путинниң урушиға қандақ йосунда арилишидиғанлиқи явропа-хитай мунасивитиниң алға илгирилишидики һәл қилғуч амил болуп қалидиғанлиқини” тәкитлигән.

Ройтерсниң хәвәр қилишичә, урсула вон дер лейен келәр һәптә фирансийә президенти еммануел макрон билән бирликтә хитайни зиярәт қилидиған болуп, у бу сөзләрни зияритидин аввал йәни 30-март күни бирюсселда қилған.

30-Март күни йәнә, хәлқара кишилик һоқуқни көзитиш тәшкилати мәхсус баянат елан қилип, келәр һәптә хитайда зиярәттә болидиған явропа комиссийониниң рәиси урсула вон дер лейен вә фирансийә президенти еммануел макронни зияритидә уйғурлар мәсилисини оттуриға қоюшқа чақирған.

Мәзкур орган баянатида: “юқиридики икки рәһбәрни ши җинпиң билән учрашқанда уйғур елида йүз бериватқан инсанийәткә қарши җинайәтни оттуриға қоюп, бу җинайәт һәққидики әндишилирини очуқ-ашкара оттуриға қоюшқа чақирған. Баянатта йәнә, уларниң сахароф мукапати саһиби илһам тохтиниму сүрүштүрүши тәләп қилинған.

Бүгүн, кишилик һоқуқни көзитиш тәшкилатиниң баш директори тирана һасанму тивиттир арқилиқ қилған сөзидә урсула вон дер лейен вә фирансийә президенти еммануел макронни хитайдики зияритидә хитайниң уйғур ели, тибәт вә хоңкоңдики дәпсәндичиликлири һәққидә сөзләшкә дәвәт қилған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.