Сан франсиско айродромида уйғурларға қарши чиққанлар кимләр?

Вашингтондин мухбиримиз җәвлан тәйярлиди
2023.11.15

11-Айниң 14-күни, американиң сан-франсиско шәһиридә өткүзүлидиған “асия-тинч окян иқтисадий һәмкарлиқ йиғини” ға қатнишиш үчүн кәлгән хитай рәиси ши җинпиң катта дағдуға билән күтүвелинған. Һөкүмәткә майил “таңҗяң юртдашлар уюшмиси” дегәндәк хитай тәшкилатлири оқуғучиларни тәшкилләп, намайишчиларға қарши паалийәт елип барған.

Бу күни уйғур, тибәт, хоңкоң вә тәйвән намайишчилири ши җинпиңға қарши намайиш қилған болуп, уйғур намайишчилар ши җинпиң өтидиған йол бойида ай-юлтузлуқ көк байрақни чиқирип, “уйғур ирқий қирғинчилиқини тохтат!” дәп шоар товлиған. Ши җинпиңни қоллайдиған вә уни күтүвелишқа чиққан хитайларму қизил байрақлирини көтүрүп шу йәргә келип, намайишчиларға һәйвә көрсәткән.

Намайишчиларни аз санлиқ орунға чүшүрүп, уларниң авазини бесиқтурушқа урунған бу аталмиш “ши җинпиңниң қоллиғучилири” әмәлийәттә һөкүмәткә майил хитай тәшкилатлири уюштурған күтүвелиш паалийитигә қетилғанлар икән.

14-Ноябир күни, “тибәткә әркинлик оқуғучилар уюшмиси” ниң X дә чиқарған видийосида, бир тибәт оқуғучи бу оқуғучиларға хитай тәрәпниң азрақтин пул вә чүшлүк тамақ берип бу йәргә елип кәлгәнликини ейтқан. Шундақла уларға қаритип туруп “маву хитай оқуғучилар ирқий қирғинчилиқ йүргүзгән һакимийәтни қоллап, бу йәрдә номус қилмай қарап турмақта. Уларниң виҗдани йоқму?”” дәп соал қойған.

Радийомиз хитай бөлүминиң бәргән хәвиридә ейтилишичә, 14-ноябир күни, ши җинпиң чүшидиған айродромниң сиртида ши җинпиңға қарши турғучилар билән ши җинпиңни қоллиғучилар арисида тоқунуш йүз бәргән. Сақчилар уларға мудахилә қилған. “ши җинпиңниң қоллиғучилири” аптобуста тошуп келингән оқуғучилар болуп, улар “қизил байрақ ләпилдәйду” дегәндәк музикиларни қойған, намайишчилар уларға қарши һалда матәм музикисини қойған. Намайиштин кейин бу оқуғучилар паалийитини түгитип, йәнә аптобус билән у йәрдин айрилған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.