Xitay re'isi shi jinping 2-iyuldin 6-iyulghiche qazaqistan we tajikistanda ziyarette bolidiken
2024.07.01
Xitay re'isi shi jinping 2-iyuldin 6-iyulghiche qazaqistan we tajikistanda ziyarette bolidiken, shundaqla bu mezgilde u yene qazaqistanning sahibxanliqida ötküzülidighan shangxey hemkarliq teshkilati bashliqlar yighinigha qatnishidiken. Shi jinpingning ziyariti béyjing da'iriliri ottura asiya jumhuriyetlirige qarita diplomatik pa'aliyetlirini kücheytken bir waqitta élip bérilmaqta. Shi jinping ottura asiya jumhuriyetlirining rehberliri bilen ötken yili 5-ayda shi'ende ötküzgen bashliqlar yighinida ikki terepning iqtisadiy we diplomatik alaqilirini téximu chongqurlashturushni chaqirghan idi.
Firansiye agéntliqining xewer qilishiche, xitay tashqi ishlar ministirliqining bayanatchisi xu'a chünying 30-iyun yekshenbe küni élan qilghan bayanatida, bu qétimliq ziyaret jeryanida “Re'is shi jinpingning astanada ötküzülidighan shangxey hemkarliq teshkilatining 24-qétimliq bashliqlar yighinigha qatnishidighanliqi”, shundaqla qazaqistan bilen tajikistanda dölet ziyaritide bolidighanliqini bildürgen.
Xu'a chünying, shi jinpingning 2-iyuldin 6-iyulghiche bolghan ariliqtiki qazaqistan we tajikistan ziyaritining pirézidént toqayéf bilen pirézidént imam rahmanning teklipige bina'en élip bérilidighanliqini éytqan, lékin ziyarette muzakire qilinidighan konkrét mesililer heqqide héchqandaq uchur bermigen. Firansiye agéntliqining bildürüshiche, ottura asiya xitayning “Bir belbagh bir yol” xelq'ara ul esliheler tereqqiyat türining muhim halqisi bolup, ottura asiya jumhuriyetliri moskwaning ighwagerchilik xaraktéridin barghanche endishe qiliwatqan bir peytte, béyjing moskwaning ukra'inagha qoralliq tajawuz qilishidin kélip chiqqan bu rayondiki boshluqni toldurmaqchi iken. Shi jinpingning ziyariti xitayning yéqinda özbékistan we qirghizistan bilen qeshqer-osh-perghane tömüryol kélishimini resmiy imzalishi, shundaqla qirghizistan parlaméntining ötken hepte talash-tartishtiki bu kélishimni testiqlishining arqisidin élip bérilmaqta.