Shi jinping tibet butxanilirida “Milletler ittipaqliqi” mesilisini qayta tekitlidi

“Jenubiy xitay etigenlik pochta” gézitining 20-iyundiki xewiride éytilishiche, xitay re'isi shi jinping yéqinda chingxey ölkiside xizmet tekshürüshide bolghan hemde tibet buddizmining muqeddes sejdigahliridin bolghan bir qisim ibadetxanilarni ziyaret qilghan. Bolupmu u bu qétim ziyaret qilghan ibadetxanilar birdek shining shehiride bolup, 1951-yili xitay hökümiti bilen tibet rehberliri otturisidiki tibetning kelgüsi siyasiy teqdirige munasiwetlik muzakiride achquchluq rol oynighan tarixiy orunlar hésablinidiken.

Xewerdin melum bolushiche, shi jinping bu qétimmu “Jungxu'a milliti ortaq éngini” kücheytish, “Partiyeni we dinni söyüsh” mesililirini tekitligen. Shuningdek tibet buddizmining bu bash téma üchün xizmet qilishi lazimliqini eskertken. Bu jeryanda “Dinni xitaychilashturush” ning omumi yönilishige qet'iy egeshken halda milletler ittipaqliqini zor küch bilen algha sürüsh, shundaqla diniy ishlar we diniy mu'esseselerni yaxshi bashqurush” ni tekitligen. Bu hal xitay hökümitining Uyghur diyaridiki “Milletler ittipaqi” teshwiqati bilen pütünley oxshash bolghan shekilde otturigha chiqqan.

Bu qétimqi ziyaret amérika dölet mejlisi “Tibet siyasiti qanuni” ni maqullap bir hepte ötkende wujudqa chiqqan. Bu qanun boyiche amérika hökümiti tibet heqqidiki uchur urushigha taqabil turush qatarliq sahelerge ajratqan mebleghni köpeytidiken. Yene kélip 20-iyun küni amérika dölet mejlisining nensi pélosi qatarliq yette neper ezasidin terkib tapqan bir ömek hindistandiki daramsalada tibetlerning sergerdan dahiysi dalay lama bilen uchrashqan. Xitay tashqi ishlar ministirliqi buninggha reddiye bérip “Dalay lama biz bilen bolghan söhbetni eslige keltürmekchi bolsa özining siyasiy mewqediki xataliqini toluq toghrilishi lazim” dégen.