“хитай истратегийәлик риқабәт комитети” байденни хитайниң уйғур ирқий қирғинчилиқини җавабкарлиққа тартишқа чақирди

Америка пирезиденти җов байдин билән хитай рәиси ши җинпиң 15-ноябир чаршәнбә күни американиң сан-франсеско шәһиридә көрүшидиған бир пәйттә, байдин һөкүмити кишилик һоқуқ тәшкилатлири вә америка дөләт мәҗлиси әзалириниң уйғур ирқий қирғинчилиқини тохтитишни тәләп қилиш һәққидики қаттиқ бесимиға дуч кәлмәктә.

Америка авам палатаси америка-хитай риқабити алаһидә комитетиниң рәиси майк галлагер 11-ноябир күни америка FOX телевизийә қанилиниң зияритини қобул қилғанда, байдинниң хитайни уйғур ирқий қирғинчилиқи үчүн җавабкарлиққа тартишини тәләп қилған. Буниң алдида америка дөләт мәҗлиси хитай ишлири иҗраийә комитетиниң қош рәислиридин, авам палата әзаси киристофер симит вә кеңәш палата әзаси җеф маркелий байденниң ши билән көрүшкәндә хитайдики сиясий мәһбуслар мәсилисини сөзлишишини тәләп қилғаниди.

Майк галлагер Fox телевизийә қанилида мундақ дегән : “биз айлардин бери нурғун кабинет министирлирини, җон кәрийни хитайға йоллап, бу көрүшүш үчүн хитайға ялвурдуқ вә бу бир бәдәлгә тохтиди. Лекин һөкүмәт 2 йилдин бери бирму хитай яки хоңкоң әмәлдариға хоңкоң аптономийәсини йоқ қилғанлиқи үчүн җаза йүргүзүп бақмиди. Җасуслуқ һава шари вәқәсини җимҗит йиғиштурди. Шинҗаңдики ирқий қирғинчилиқ үчүн һечкимни җазалимиди. Ковид-19 вирусиниң келиш мәнбәсигә қарита һәқиқий тәкшүрүш елип бармиди” .

Майк галлагерниң илгири сүрүшичә, хитай компартийәсигә йол қоюш униң техиму һәддидин ешишини кәлтүрүп чиқиридикән.

Ақсарай пирезидент байдинниң ши җинпиң билән америка-хитай арисидики алақә қаналлирини очуқ тутушни, икки дөләт арисидики җиддийликниң тоқунушқа айлинип кетишидин сақлиниш йоллирини сөзлишидиғанлиқини қәйт қилмақта. Лекин австралийәлик хитай сәнәткар бадюсавға охшаш бәзи паалийәтчиләр X та йәни бурунқи твиттерда инкас йезип, ши җинпиңниң уйғур ирқий қирғинчилиқидики мәсулийити сәвәблик һәрқандақ бир демократик дөләткә қәдәм басқан һаман қолға елиниши керәкликини билдүргән.